Púkafrétt

Barnamenningarhátíð Vestfjarða Púkinn stendur nú yfir. Við í Grunnskóla Önundarfjarðar erum búin að taka viðtöl við Flateyringa og einn bónda í Önundarfirði til að leita að svari við spurningunni ,,Hvers vegna búum við hér“ sem er yfirskrift Púkans að þessu sinni. Við byrjuðum á því að taka ákvörðun um hvernig verkefni við vildum vinna í vikunni. Niðurstaðan var að gera myndband með viðtölum. Síðan sömdum við spurningarnar sem við vildum fá svör við. Við reyndum að finna ólíka viðmælendur, úr Grunnskóla Önundarfjarðar, úr Lýðskólanum, úr fjölskyldum okkar og aðra úr samfélaginu okkar.

Nemendur lærðu ýmislegt nýtt. Til dæmis að beina myndavélinni að þeim sem var að tala. Þau lærðu einnig á forritið cap cut sem er til að klippa myndbönd. Þau tóku upp á mörg tæki og þurftu svo að senda og safna á eitt tæki. Það þurfti mikla þolinmæði við að setja texta við öll viðtölin. Mesta áskorunin var að æfa sig að tala við fólk úr samfélaginu. Sum nefndu að það hafi verið dálítið erfitt að hafa úthald til að einbeita sér að verkefninu. Nemendur höfðu gaman að verkefninu og stóð þar upp úr að semja spurningarnar, taka viðtölin og þegar þau fengu einn viðmælandann til að leita að símanúmerum fyrir sig.

Það er ýmislegt gott við að búa á Flateyri og í Önundarfirði og sennilega erum við hér þess vegna. Þorpið er lítið. Hér eru engar biðraðir. Hér finnum við fyrir öryggi. Hér erum við nálægt náttúrunni, stutt í fjöruna og skóginn. Klofningur er merkilegur klettur og Holtsfjaran er æði. Það er hægt að labba ofan á A-inu. Hér höfum við leikskóla, grunnskóla og lýðskóla. Það er stutt í næstu bæjarkjarna. Við höfum frisbígolfvöll, körfuboltavöll, sparkvöll, leikvöll, ærslabelg, hjólabraut, skautasvell, sundlaug, íþróttahús, verslun, kaffihús, veitingastaði, skrifstofuhótel og bensínstöð. Hér höfum við líka skemmtilegt fólk og gæludýr.

Og svo er G.Ö. langbesti skólinn.

Púkakveðja frá nemendum Grunnskóla Önundarfjarðar

Leikritið Draugalega fótboltaferðalagið

Draugalega fótboltaferðalagið, takið eftir leikmynd og leikmunum sem nemendur unnu að

Pabbabrandarar ;)

Kynning

Teiknikeppni

Teiknikeppni

Teiknikeppni

Teiknikeppni

Salurinn

« 1 af 9 »

Á miðvikudaginn tókst okkur að halda árshátíðina okkar á milli vetrarlægða sem hafa sett strik í reikninginn í vikunni. Tókst hátíðin frábærlega vel. Mía í öðrum bekk samdi leikrit og fékk svo Izu í 4. bekk til að gerast meðhöfundur og leggja með henni lokahönd á handritið. Leikritið heitir Draugalega fótboltaferðalagið. Allir nemendur yngsta stigs léku eða sáu um að allt gengi upp á sviðinu en fengu einnig eldri nemendurna til að taka að sér hlutverk. Yngri nemendurnir sýndu einnig myndband sem sýndi hefðir og helgidaga sem þau hafa verið að læra um og fengu gesti til að giska á hvað væri um að ræða hverju sinni. Eldri nemendurnir gerðu grín að starfsfólki í myndbandi, léku pabba sína segja pabbabrandara á sviðinu, sáu um kynningu og leiki. Foreldrafélagið hélt uppteknum hætti og sá um að borð svignuðu af girnilegum veitingum. 

Á mánudag og fimmtudag var appelsínugul viðvörun vegna veðurs sem hafði ekki teljandi áhrif á skólastarf fyrri daginn en í gær var veðrið heldur verra og meiri snjór búinn að safnast fyrir svo þau fáu sem mættu nutu öðruvísi skóladags þar sem gengið var frá eftir árshátíð, mikið var spilað og horft á mynd. Í dag voru svo öll mætt á ný og við lásum, skrifuðum saman ævintýri, föndruðum páskaskraut, leituðum að páskaeggjum um skólann og lásum málshættina saman. 

Nú erum við farin í páskafrí og mætum aftur til starfa þriðjudaginn 2. apríl. 

Gleðilega páska. 

Hvað skyldi vera verið að æfa þarna? Það verður spennandi að sjá þegar þú mætir á Árshátíð G.Ö. 2024 :)

Þessa vikuna stendur yfir undirbúningur fyrir Árshátíð Grunnskóla Önundarfjarðar. Nemndur ætla að sýna atriði á sviði og á skjá og einnig að fá gesti til þátttöku í atriðum. Það er að mörgu að hyggja og ganga æfingar og annar undirbúningur vel og erum við spennt fyrir að taka á móti gestum miðvikudaginn 20. mars klukkan 18:30. Að vanda verður foreldrafélagið með fjáröflun og selur sínar margrómuðu veitingar. 

Við hlökkum til að sjá húsið fyllast af gestum :)

Hópur nemenda úr 7. bekk á Flateyri, Suðureyri og Þingeyri, með viðurkenningar fyrir þátttöku í undanúrslitum Stóru upplestrarkeppninnar, ásama dómnenfd.

Dómnenfndin.

« 1 af 2 »

Í síðustu viku fóru undanúrslit Stóru upplestrarkeppninnar fram í G.Ö. Það voru 7. bekkingar frá Suðureyri, Þingeyri og Flateyri sem spreyttu sig á lestri úr bókinni Kennarinn sem hvarf eftir Bergrúnu Írisi, ljóði eftir Kristján frá Djúpalæk og loks ljóði að eigin vali. Öll stóðu þau sig með stakri príði en eftir milkla yfirlegu dómnefndar sem skipuð var Steinunni Ásu, Sigríði Júlíu og Erlu Margréti stóðu tveir verðugir fulltrúar eftir sem fara áfram í Stóru upplestrarkeppnina sem haldin verður á Þingeyri 11. apríl næstkomandi. 

Þessi mynd er tekin áður en haldið var heim, gleði og vellíðan eftir góða hreyfingu.

Önnur mynd tekin eftir hreyfingu og myndasmiðurinn með ;)

Á skíðum skemmti ég mér

Tilþrif á gönguskíðum

Á skíðum skemmti ég mér

Það þarf líka að kunna að detta og standa upp.

Tilþrif á gönguskíðum

Á fleigiferð upp í móti

Á skíðum skemmti ég mér

Á skíðum skemmti ég mér

Á skíðum skemmti ég mér

Á skíðum skemmti ég mér

« 1 af 12 »

Við gripum góðan dag í vikunni og fórum upp í Seljalandsdal á gönguskíði en við erum svo heppin að Íþróttafélagið Grettir hefur séð um að útvega gönguskíði sem við höfum til taks í skólanum. Núna eru til skíði og skór á alla nemendur skólans. Að fara á gönguskíði er svo frábær alhliða hreyfing. Stundurm þarf að erfiða við að komast áfram og stundum rennur maður áfram áreynslulaust en alltaf þarf að einbeita sér að jafnvæginu. Frábær dagur sem gaf okkur gleði, vellíðan, góða hreyfingu, seiglu æfingu og aukið sjálfstraust.Takk Grettir fyrir að gera þetta mögulegt, takk fyrir góðar móttökur starfsmenn gönguskíðasvæðisin í Seljalandsdal. 

100 algengustu orðin nýtum við í lestrinum til að þjálfa sjónrænan orðaforða og nefnuhraða.

Við höfum bækurnar í alfaraleið og byggjum upp lestrarhvetjandi umhverfi.

Skákin á alltaf sess í skólastarfinu. 5. janúar minntumst við Sigga Habb sem hefði orðið 65 ára þann dag. Af því tilefni var teflt og drukkið kakó við leiði hans. Minningin lifir.

Smáfuglarnir fengu þetta gómsæta fóður sem búið var til úr tólg og ýmsu kornmeti. Sumir tók með sér heim til að geta fylgst með fuglunum koma og sækja sér æti en einnig var hengt upp við skólann.

Á Þorrablótinu var farið í allskonar leiki sem reyndu á. Við prófuðum að stökkva yfir sauðalegg með því að halda um báðar stóru tærnar og hvetjum ykkur til að prófa heima. Á myndinni eru nokkur að spreyta sig á því að reisa horgemling.

Hér sést hópurinn sem fór um bæinn syngjandi og segjandi brandara öllum þeim sem þegið höfðu að fá þau í heimsókn. Að launum komu þau með rúmt kíló af góðgæti hvert.

Á öskudaginn er hefð hjá okkur að enda daginn á Tarzanleik í íþróttahúsinu.

Okkur er umhugað að vera nýtin. Eldri nemendurnir eru að vinna að sjálfbærni í smíðatímunum og ákváðu að taka einn gömlu hefilbekkjanna og laga hann til.

Okkur leiðist nú ekki að hafa frost og geta skautað á Siggasvelli. Nemendur eru orðnir vel þjálfaðir í að fara í og úr skautunum sem gefur tækifæri til að hendast á skauta í frímínútum.

Á alþjóðlega skákdeginum var horft á stutta fræðslumynd um Friðrik Ólafsson skákmeistara, síðan var farið í ýmsa skákleiki og að lokum teflt.

« 1 af 10 »

Heil og sæl

Nú erum við komin til starfa endurnærð eftir gott vetrarfrí. Það er margt sem við erum búin að áorka á fyrstu vikum ársins 2024. Við höfum haldið vel á spöðunum í lestrarnáminu og náðum því markmiði skólans að allir nemendur myndu bæta sinn eigin árangur og enn höldum við ótrauð áfram. Í umbótaáætlun okkar er eitt markmiðanna að bæta árangur hvers og eins nemanda í lestri. Foreldraviðtöl fóru fram í upphafi febrúar. Við steingleymdum að árið 2023 hafi verið rímspyllisár og þjófstörtuðum Þorra því 19. janúar. Á Öskudaginn eru hefðirnar hjá okkur að búa til Öskupoka í byrjun dags og taka þá svo með út í bæ þegar við förum og syngjum fyrir þau sem hafa ákveðið að taka á móti okkur með góðgæti. Við erum svo heppin að skautasvellið er alveg við skólann svo við getum nýtt það í námi og frímínútum. Íþróttafélagið Grettir hefur einnig aukið við gönguskíða eignina og núna höfum við skíði og skó fyrir alla nemendur en áður vorum við með fyrir yngri nemendurna. Veturinn hefur verið okkur hliðhollur hvað varðar snjó og frost svo það er líka búið að gera snjóhús og ýmis snjólistaverk. Við hugsum líka um smáfuglana sem eiga erfiðara með að finna sér æti þegar allt er frosi. Útbúnar voru  fóðurstöðvar fyrir þá og fóru sumir með stöð heim til að fylgjast með þegar fuglarnir kæmu en aðrar  vour hengdar upp nærri skólanum. Myndir segja meira en mörg orð og verður skólastarf fyrstu mánaða ársins hér rifjað upp með myndium og skýringum við þær. 

Umræðuhringur í þnglok

Í síðustu viku héldum við nemendaþing í skólanum í tilefni af Degi mannréttinda barna sem er 20. nóvember ár hvert. Þetta er í fyrsta sinn sem við sem nú störfum við skólann höldum nemendaþing en áður höfum við farið með nemendur á stórt nemendaþing sem haldið var af Ísafjarðarbæ og einnig tókum við þátt í einu nemendaþingi á Suðureyri. Yfirskrift nemendaþingsins okkar var Umburðarlyndi. Vinnan á þinginu var í formi hópavinnu og voru kennarar ritarar í hópunum. Eftirfarandi spurningum  var svarað á þinginu:

1. Af hverju skiptir máli að líða vel í skólanum?
a) Hvað geta nemendur gert svo öllum líði vel í skólanum
b) Hvað getur starfsfólk gert svo öllum líði vel í skólanum?

2. Af hverju er umburðarlyndi mikilvægt í skólanum?

3. Hvernig myndar maður (býr maður til) jákvæða stemningu í skólastofunni?

Nemendaþingið gekk mjög vel og var gaman að sjá og heyra að öll tóku þátt í umræðunni. Þegar börnin voru spurð hver tilgangurinn væri með nemendaþingi, stóð ekki á svari: Til þess að raddir barna fái að heyrast. 

Þegar búið var að fara hringinn og allir hópar höfðu svarað spurningunum var tekin umræða um skólasáttmálann okkar og settar niður á blað hugmyndir að því hvað þau vilja að sé í skólasáttmála og hvaða gildi er mikilvægt að endurspegli hann. Gildi Grunnskóla Önundarfjarðar eru gleði, virðing, metnaður og ábyrgð. Von bráðar verðum við búin að koma skólasáttmálanum upp á vegg. 

Þennan mánuðinn stendur yfir lestrarátak hjá okkur í G.Ö. og kom þá upp sú frábæra hugmynd að kalla mánuðinn lesember. Við eigum von á fullt af nýjum bókum í hús eftir helgina og er þar á meðal ein eftir nágranna okkar hana Helen Cova, bókin Svona tala ég. 

Í lesember er tekinn lestrarsprettur þar sem sami textinn er lesinn aftur og aftur og tíminn tekinn til að sjá hvað hægt er að bæta hraðann með endurtekningunni. 

100 algengustu orðin eru á veggnum í stigaganginum og virkilega gaman að fara þangað og athuga hvað maður getur verið fljótur að lesa þau. Markmiðið er að læra að þekkja þau og gera að sjónrænum orðaforða, þ.e. orð sem við þurfum bara að sjá til að lesa en ekki hljóða okkur í gegnum. Markmið með tímanum er að ná að lesa öll hundrað á innan við mínútu. 

Nemendur æfa sig einnig í að svara spurningum úr lesnum texta og auka þannig lesskilninginn. 

Safarík orð eru tekin út úr textanum og merking þeirra krufin. Safaríkum orðum er safnað á tússtöflu í anddyri.

Leitað hefur verið að upplýsingum um höfunda. Það skiptir nefnilega miklu máli að þekkja góða rithöfunda til að auðvelda val á næstu bók til að lesa. 

,,Nýyrði" Jónasar Hallgrímssonar hafa verið skoðuð og spáð í hvernig ný orð verða til og búin til ný orð á hluti sem við eigum ekki orð yfir. 

Ritun á einnig stóran þátt í lesember. Skrifaðar hafa verið allskonar sögur og fleira. 

Heil og sæl 

Við settum okkar árlega kaffihús á dagskrá í nóvember þar sem við tengjum það oftast við dag íslenskrar tungu. Núna langar okkur til að prófa að hafa kaffihúsið á aðventunni og höfum þess vegna frestað því og verður það í byrjun desember. Nánari tímasetning og dagskrá verður auglýst þegar nær dregur. 

Öll tilbúin til að hlaupa af stað

Hlaupið hafið

Bleikur drykkur vel við hæfi í október

« 1 af 3 »

Á miðvikudaginn tókum við þátt í Ólympíuhlaupi ÍSÍ og stóðum okkur öll með stakri príði, bæði nemendur og starfsfólk. Það er bara árangur nemenda sem má skrá til þátttöku og lögðu þau samanlagt 35 kílómetra að baki. Að hlaupi loknu fengu allir bleikan drykk hlaðinn orku úr ávöxtum og einnig vorum við svo heppin að yngra stigið var búið að vinna sér inn poppveislu og bauð öllum að vera með.