VALMYND ×

Fréttir

Föstudagsfréttir úr G.Ö. 27. nóvember 2020

Jólaskraut unnið í fab lab
Jólaskraut unnið í fab lab
1 af 10

 

Heil og sæl

Vikan hófst með þemavinnu tengdri kaffihúsinu sem okkur tókst að halda á þriðjudaginn. Yngsta stigið skreytti glugga með húsunum sínum, líkönum af Goðahólnum og ljósmyndasýningu með eigin ljósmyndum en allt þetta tengist þemanu þeirra Flateyrin okkar. Þau voru líka með vísindaglugga. Miðstigið sýndi sjö mínútna myndband þar sem þau sögðu sögu Lagarfljóstormsins, þau sýndu einnig listaverk af Drangajökli og Dynjanda en þau hafa verið að læra um Vestfjarðakjálkann og Austurland. Þau sýndu einnig stjörnukort sem þau bjuggu til með plötu og ljósaseríu. Unglingastigið vann með ljóð og skreytti gluggana sína með ljóðum og myndum. Einng sá unglingastigði um að útbúa allar veitingar og voru þær ekki af verri endanum. 

Í svona vinnu reynir á frumkvæði, sköpun og sjálfstæð vinnubrögð og geftst því gott tækifæri til að meta námið út frá lykilhæfnimarkmiðum Aðalnámskrár. Lykilhæfni er almenn hæfni nemanda óháð námssviðum en er aldurstengd og fléttast inn í alla kennslu og námsmat. 

Allir nemendur lögðu mat á eigið nám. Yngstu nemendurnir fengu þessar þrjár spurningar: 

Hvað lærðir þú af því að vinna þetta verkefni?

Hvað var erfiðast?

Hverju ertu stoltastur af?

Þegar svör þeirra eru skoðuð kemur í ljós að oftast eru þau stoltust af því sem þeim þótti erfiðast sem sýnir þó nokkra seiglu. 

Miðstig og unglingastig mátu frumkvæði, sjálfstæði, áhrif, ábyrgð, færni sína í að gagnrýna og að taka leiðsögn og gagnrýni og hversu góður vinnufélagi þau séu. En allt eru það lykilhæfni þættir. 

Þó sýningin sjálf og hátíðin í kringum hana sé alltaf skemmtileg er það ferlið sem skiptir mestu máli og sá þroski og reynsla sem skapast á leiðinni að markmiðinu. 

Á miðvikudaginn fóru unglingarnir svo á Ísafjörð þar sem Eva kenndi þeim í Fab lab en þær hafa verið að undirbúa sig undanfarna miðvikudaga. Við stefnum á einn miðvikudag á Ísafirði í viðbót fyrir jólin. Það var ýmislegt fallegt sem kom út úr skurðarvélunum, meðal annars jólaskraut. 

Sundkennsla undir stjórn Lísu Sigurðardóttur heldur áfram í næstu viku, á þriðjudag og fimmtudag. 

Bestu kveðjur og góða helgi

Sunna

Kaffihús 24, nóvember og fleiri fréttir

Stjörnuhiminn í mótun
Stjörnuhiminn í mótun
1 af 4

Heil og sæl

Við erum ákveðin í að halda okkar striki og hafa okkar árlega kaffihúsakvöld þó það séu öðruvísi tímar og við þurfum að fara aðrar leiðir en áður. Viðburðurinn verður þriðjudaginn 24. nóvember og hefst klukkan 17:00. 

Nemendur unglingastigs selja veitingar í anddyri frá kl. 17:00- 18:00 og geta gestir notið þeirra meðan þeir skoða verk nemenda í gluggum skólabyggingarinnar.  

Verkin tengjast ýmsu því sem nemendur hafa verið að fást við að undanförnu, Flateyrin okkar, Vestfjarðkjálkinn, Austurland, stjörnuhimininn og ljóð svo eitthvað sé nefnt. 

Annars er bara allt gott að frétta af okkur, það var léttir að taka niður grímurnar á miðstiginu í vikunni og fá að fara í íþróttahúsið. 

Við fáum Lísu Sigurðardóttur til liðs við okkur í næstu viku en hún er í námi í Íþrótta- og heilsufræði MT og ætlar að kenna sund hjá okkur fram að jólafríi. Fyrstu sundtímarnir verða á fimmtudaginn. 

Í næstu viku hefst líka íþróttastarf HSV og verða tímar fyrir 1.-7. bekk strax að loknum skóladegi eða kl 13:20 á þriðjudögum og fimmtudögum. Leiðbeinandi þar verður Hrefna Ásgeirsdóttir og  til að byrja með verður Heiðar Birnir Þorleifsson með henni. 

Meðfylgjandi myndir eru af umdirbúningi fyrir sýninguna sem verður á þriðjudaginn. 

Bestu kveðjur og góða helgi

Sunna

Allt mjakast þetta í rétta átt

Heil og sæl

Nú liggur endanlega fyrir hvernig verður með tilslakanir frá og með morgundeginum, 18. nóvember: 

  • Börn í 5. – 7. bekk grunnskóla verða undanþegin grímuskyldu og 2 metra nálægðartakmörkunum, líkt og yngri börn í grunnskóla og leikskólabörn. Grímuskylda kennara gagnvart þessum börnum verður einnig afnumin. Grímuskylda og nálægðartakmörkun eiga því við milli starfsfólks í leik- og grunnskólum, milli starfsfólks og nemenda í 8.–10. bekk og milli nemenda í 8.–10. bekk.

 

  • Áfram gildir sú regla að ekki mega vera fleiri en 50 nemendur í sama rými í leikskóla og í 1.-4. bekk grunnskóla og ekki fleiri en 25 nemendur í sama rými í 5.-10. bekk grunnskóla.

 

  • Engar kröfur verða gerðar á útisvæðum leik- og grunnskóla sem hindra blöndun hópa, fjöldatakmarkanir, nálægðartakmarkanir eða grímunotkun.

 

  • Íþrótta- og sundkennsla í grunnskólum er heimil með sömu takmörkunum og gilda fyrir annað skólastarf innanhúss að frátalinni grímuskyldu á unglingastigi.  Fjöldatakmarkanir eru þær sömu og í skólastarfinu (25/50)en ekki þarf að viðhalda sömu hópaskiptingu.

 

  • Halda skal sömu hópaskiptingu nemenda í grunnskólastarfi, í félagsmiðstöðvum og á frístundaheimilum þannig að ekki verði blöndun milli nemendahópa.

 

  • Skipulagt íþrótta-, æskulýðs- og tómstundastarf barna á leikskólaaldri er heimilt þó að hámarki 50 börn saman. Ekki þarf að halda sömu hópaskiptingu og er í leikskólastarfi.

 

  • Skipulagt íþrótta-, æskulýðs- og tómstundastarf barna á grunnskólaaldri er heimilt, þ.e. að hámarki 50 börn í 1.–4. bekk og að hámarki 25 í 5.–10. bekk. Ekki þarf að halda sömu hópaskiptingu og er í grunnskólastarfi.

 

  • Ekki er gerð nein breyting á greininni um tónlistarskólann í nýrri reglugerð. Þar gildir því áfram 10 manna hámarksfjöldi í rými, 2ja metra nálægðartakmörkun milli nemenda innbyrðis og nemenda og kennara og grímuskylda þar sem við verður komið. Viðhalda þarf sömu hópaskiptingu og í skólastarfi.

Föstudagsfréttir 6. nóvember 2020

Vísindatími á yngsta stiginu
Vísindatími á yngsta stiginu
1 af 4

Nú er fyrsta vikan að baki með þeim hertu aðgerðum sem hófust 3. nóvember s.l. Skólastarfið gengur vel þrátt fyrir allt og fylgja nokkrar myndir hér með sem sýna brot af því sem fengist var við í  vikunni. 

Yngsta og miðstig fengu heimsókn frá Þórunni skólahjúkrunarfræðingi sem ræddi við 4. 5. og 6. bekkinn um kvíða og kenndi þeim að gera núvitundaræfingu og við 1.2. og 3. bekk ræddi hún um tilfinningar, hvernig við upplifum þær og hvað hefur áhrif á það hvernig okkur líður.

8. nóvember ár hvert er baráttudagur gegn einelti og ætlum við að vinna markvisst með samskipti í næstu viku og enda á þvi að gera sýnilegan vegg með okkar sáttmála. Á mið og unglingastigi hófst vinnan í dag með því að nýta verkfæri Uppbyggingarstefnunnar - uppeldi til ábyrgðar. Nemendur greind þá hvaða þörf er þeim mikilvægust en þarfirnar eru fimm; öryggi, en enginn er undanskilinn því að hafa þá þörf. Hinar fjórar eru mis ríkjandi hjá einstaklingum og eru þörfin fyrir að tilheyra, þörf fyrir áhrif, þörf fyrir frelsi og þörf fyrir gleði. Öllum þessum þörfum fylgja ótal góðir kostir. Við getum svo lent í því að fara út fyrir mörkin og uppfylla þörfina á neikvæðan hátt. Við munum halda vinnunni áfram því til að vita hvaða manneskjur við viljum vera þurfum við að geta skilgreint hvaða þarfir það eru sem drífa okkur áfram. Síðnan munum við nota fleiri verkfæri uppbyggingarstefnunnar í framhaldinu með það að markmiði að tryggja góðan skólabrag. 

Hugmyndir að útfærslu fyrir kaffihúsakvöldið voru ræddar og miðast þær við að ekki verði ennþá orðið leyfilegt að taka marga gesti í hús. Við stefnum á að halda dagsetningunni 24. nóvember en græja þetta með þeim hætti sem aðstæður bjóða upp á. Meira um það þegar nær dregur. 

Við förum ótrauð full af bjartsýni inn í næstu viku og vonum að allt verði léttara eftir hana. 

Bestu kveðjur og góða helgi

Sunna

Upplýsingar eftir fyrsta skóladag með hertum aðgerðum

Heil og sæl

Það gekk allt ljómandi vel hjá okkur í dag. Skólinn okkar er eitt sóttvarnarrými sem þýðir að ef það væru eingöngu yngri nemendur í rýminu mættu vera 50 manns en þar sem við erum með eldri nemendur líka miðast fjöldinn við 25 nemendur. Sóttvarnarrými þarf að hafa sérinngang og sér salernisaðstöðu. 

Til að gera enn betur höfum við ákveðið að fækka smitflötum sem allir koma nálægt og skipta salernunum í yngsta stig og mið-og elstastig. Einnig höfum við látið yngsta stigið borða á neðri hæðinni, miðstig við matarborð á efri hæð og unglingastig í sinni stofu. 

Grímunotkun var mikil fyrsta daginn hjá öllum aldurshópum en þar sem rýmið er mjög gott hjá okkur og auðvelt að eiga sinn tveggja metra radíus er hægt að hvíla sig á grímunum og nota þær bara þegar nálægð er meiri. Í byrjun dags var farið vandlega yfir notkun á grímum og hreinlæti í kringum þær. Starfsmenn bera grímur öllum stundum sem þeir eru með nemendum. 

Eins og aðrir fengu yngstu nemendurnir leiðbeiningar um notkun á grímu í morgun. Þau eru þó undanskildir reglum um grímunotkun og er það ekki alveg að ástæðulausu. Þau eiga erfiðara með að láta grímuna vera í friði á andlitinu og endar hún þá gjarnan í höndunum á þeim, rök af andardrætti þeirra og er þá smithættan jafnvel orðin meiri en án grímunnar. 

Embætti landlæknis er að uppfæra leiðbeiningar um hlífðargrímur en þar m.a. að finna þetta: 

  • Þeir sem hafa ekki skilning eða þroska til að nota grímur rétt þurfa ekki að nota grímu (ung börn, þroskahömlun) - röng notkun á grímum getur jafnvel verið verra en að vera án grímu. 

Þetta er eingöngu til að árétta ástæðurnar fyrir því að fallið var frá því að skylda yngstu börnin til að nota grímur. Þau börn sem koma með grímur fá að nota þær og fá leiðbeiningar þar um. 

En eins og áður sagði gekk allt ljómandi vel og við ætlum að klára þetta verkefni með sóma. 

Bestu kveðjur

Sunna

 

 

Til upplýsinga um samkomutakmarkanir og börn

Eftirfarandi skilaboðum var ég beðin að koma til heimilanna: 

Samkomutakmarkanir og börn                                                                                                      Áríðandi skilaboð til foreldra og forráðamanna

Skólar og íþróttafélög skipuleggja sitt fyrirkomulag til að fara eftir fyrirmælum yfirvalda um takmarkanir á skólastarfi og samkomum, þ.m.t. fjöldatakmörkunum, rýmum og grímunotkun. Það er mikilvægt að forráðamenn barna dragi á sama tíma úr fjölda einstaklinga í tengslaneti barna sinna utan skólatíma til að vinna ekki gegn þessum ráðstöfunum. Gott er að hafa eftirfarandi í huga:

• Skólafélagar sem ekki eru í sama hópi í skólastarfinu ættu ekki að vera í návígi utan skóla.

• Hafi börnin þroska til að fara eftir leiðbeiningum sem snúa að minni snertingu við vini er ekki útilokað að þau geti hist í leikjum. Leikirnir mega ekki fela í sér beina snertingu, notkun á sameiginlegum leikföngum eða búnaði sem snertur er með berum höndum.

• Börn og ungmenni ættu ávallt að þvo sér vel um hendur bæði áður en þau hitta félaga sína og eftir að þau koma heim.

• Fjölskyldur ættu að hafa í huga að ef börnin umgangast mikið vini eða frændsystkini úr öðrum skólum eða skólahópum þá verður til tenging milli hópa sem annars væru aðskildir. Slíkt ætti að forðast eins og kostur er.

• Fjölskyldur eru hvattar til að nýta sér tæknina til að halda góðum tengslum við ástvini sem eru í áhættuhópum vegna COVID-19 sýkinga, eldra fólk og fólk með ákveðna undirliggjandi sjúkdóma.

• Einnig væri hægt að nota tækifærið að kenna börnunum að skrifa sendibréf og æfa í leiðinni skrift, stafsetningu, virkja ímyndunaraflið og hugsa í lausnum þegar kemur að samskiptum við ástvini okkar.

Varðandi heimili með börn þar sem sumir eru í sóttkví en aðrir ekki:

 Ef börnin hafa ekki þroska eða getu til að virða þær ráðstafanir sem eru forsenda þess að hluti heimilisfólks geti verið í sóttkví, þarf allt heimilið að fara í sóttkví eða þeir sem ekki eru í sóttkví að fara annað um leið og sóttkví kemur til. Mögulega gæti annað foreldrið verið í sóttkví með barni en hitt foreldrið haldið fjarlægð. Foreldri með barni í sóttkví þarf ekki að vera skráð í sóttkví og þarf ekki að fara í skimun til að stytta sóttkví í 7 daga úr 14 dögum. Það er nóg að barnið sé skráð í sóttkví og fari í sýnatöku. Þetta á t.d. við leikskólabörn í sóttkví.

 Börn sem hafa þroska og getu til að sinna eigin hreinlæti (t.d. sér salerni) og halda viðeigandi fjarlægð við foreldra (eða aðra) sem eru í sóttkví og eins við skólafélaga geta áfram sinnt námi í skóla. T.d. ef foreldri er í sóttkví gæti leikskólabarn þurft að vera líka í sóttkví en eldra systkini ekki.

 Foreldrar stálpaðra barna í sóttkví eftir útsetningu í skóla eða tómstundum sem geta haldið viðeigandi fjarlægð frá börnunum meðan á sóttkví stendur geta sinnt áfram vinnu á vinnustað ef fjarvinna er ekki möguleg.

Skipulag næstu tveggja til þriggja vikna a.m.k.


Í dag höfum við haft starfsdag sem átti annars að vera á föstudaginn.
Við höfum meðal annars skipulagt skólastarfið miðað við reglugerð um takmörkun á skólastarfi sem gildir frá 3.- 17. nóvember 2020.
Skólinn okkar er fámennur og telst því sem eitt sóttvarnarhólf og geta kennarar því sinnt öllum bekkjum eins og þarf.
Íþróttir og sund falla niður en við höfum sett útivist á stundaskrá í staðinn.
Nemendur unglingastigs geta ekki sótt tíma á Ísafirði, hvorki valfög né skóladag á þriðjudegi og hefur stundaskránni verið breytt til að koma til móts við þá kennslu. Skóladagurinn skerðist þó eitthvað við þetta.
Skóladegi hjá mið og unglingastigi lýkur kl. 13:55 á mánudögum og miðvikudögum, á þriðjudögum og fimmtudögum lýkur honum kl 13:15 og kl. 12:00 á föstudögum.
Skóladagur hjá yngsta stigi helst óskertur.
Í 5. - 10. bekk er grímuskylda ef ekki er hægt að fylgja eftir 2 metra fjarlægðarmörkum. Við höfum gott rými og nemendur þurfa því ekki að bera grímur í kennslustundum allan daginn en geta þurft þess við sérstök verkefni og að sjálfsögðu ef þau velja það. Kennarar bera grímur við kennslu þessara hópa. Skólinn útvegar grímur eftir þörfum en þeir sem eiga fjölnota grímur mega gjarnan taka þær með.
Í 1. - 4. bekk á grímuskylda ekki við.
Matur verður sóttur í Gunnukaffi og snæddur í skólahúsinu.
Spritt og gímur er staðsett í anddyri. Farið verður yfir rétta notkun á grímum með mið og unglingastigi í fyrramálið og minnt á mikilvægi þess að vera meðvitaður um eigin sóttvarnir.
Foreldraviðtöl verða tekin eins og til stóð í samráði við umsjónarkennara.

Vonandi á þetta allt eftir að ganga sem best hjá okkur og þessar takmarkanir að skila árangri.

Góðar kveðjur

Sunna

 

Októbermánuður í skólastarfinu

Nú er októbermánuður að baki og verður hér stiklað á stóru um það sem hann bar í skauti sér í skólastarfi Grunnskóla Önundarfjarðar. 

Vesfjaraðkjálka verkefnið sem var samþætt í samfélagsfræði, íslensku, ensku og dönsku hjá unglingastigi tók enda með kynningu, sem flutt var á ensku ,fyrir starfsmenn og nemendur.  Miðstigið hefur einnig verið að vinna með Vestfjarðakjálkann með ýmsum hætti. 

Yngsta stigið er enn á fullu að vinna með verkefnið Flateyrin okkar. Þau eru á fullu að búa til mynda/teiknivegg sem fer ört stækkandi. Einnig hafa þau unnið með Goðahólinn og sjá fyrir endann á þeirri vinnu í næstu viku en þá stefna þau að því að prenta út bækur með sinni sögu á bak við Goðahólinn og lesa hvert fyrir annað. 

Haldin var heljarinnar afmælisveisla þegar Erla, Silla og Zuzanna áttu afmæli með tveggja daga millibili og varð fyrir valinu að halda hana mitt á milli afmælisdaganna. Unglingastigið nýtti heimilisfræðitíma í bakstur af þessu tilefni. 

Yngri nemendurnir saumuðu sér svuntur til að nota í heimilisfræðinni og tókst vel til, engar tvær urðu eins frekar en nemendurnir sjálfir. 

Ýmsar tilraunir voru gerðar í náttúrufræðinni. Þau yngri gerðu meðal annars eldflaug þar sem matarsódi og edik var látið hvarfast saman í flösku. Mið og unglingastig var að vinna með þrýsting og gerðu ýmsar tilraunir tengdar honum. 

Engin danskennsla hefur verið þennan mánuðinn vegna þess að kennarar hafa ekki mátt kenna í tveimur skólum sama daginn. Í stað danstímanna hafa nemendur verið í verklegum tíma þar sem þeir hafa fengið að velja sér viðfangsefni og er tálgun eitt af því sem hefur orðið fyrir valinu. 

Íþróttir fóru fram utan dyra án undantekninga þó veðrið hafi verið misjafnt.  Yngstu nemendunum leiðist ekki misjafnt veður og eru í útikennslu alla miðvikudaga. I síðustu viku nýttu þau hvassviðrið til að finna kraftinn í vindinum og fylgjast með skýjunum á ferð um himininn. 

Ævar vísindamaður kom í heimsókn í gegnum fjarfundarbúnað og las upp úr nýrri bók sinni Mín eigin undirdjúp. Allir nemedndur skólans hlýddu á lesturinn og spurðu Ævar nokkurra spurninga að lestri loknum. 

Mánuðurinn endaði á heljarinnar Hrekkjavöku.  Á fimmtudaginn undirbjuggu nemendur og kennarar það sem koma skildi af miklum metnaði. Föstudagurinn hófst svo með ýmsum leikjum, fyrst feluleik meðan myrkrið var sem mest. Borðaður var grænn grautur og skreyttar muffins úr heimilisfræðinni. 

Nú tekur nóvembermánuður við með hertum aðgerðum vegna covid 19.  Starfsdagurinn sem átti að vera föstudaginn 6. nóvember verður því færður fram á mánudaginn 2. nóvember svo við getum undirbúið það sem koma skal í þeim efnum. 

Allar nánari upplýsingar verða birtar hér og á facebook síðu foreldrafélagsins jafn óðum og þær liggja fyrir. 







 

Hertar aðgerðir- upplýsingar vegna leik og grunnskóla

Upplýsingar varðandi leikskólastarfið eftir helgina:
Allt getur haldið áfram með svipuðum hætti og verið hefur. Grímuskylda á við um fullorðna þegar ekki er hægt að halda 2 metrum á milli manna, t.d. í anddyri við upphaf og lok skóladags.
Nemendur leikskóla eru undanþegnir fjarlægðarmörkum og grímunotkun.
 
 
Upplýsingar varðandi grunnskólastarf eftir helgina: 
Ákvörðun hefur verið tekin um að mánudaginn 2. nóvember verður skipulagsdagur í öllum grunnskólum Ísafjarðarbæjar. Fyrihugaður skipulagsdagur okkar föstudaginn 6. nóvember verður því skóladagur.
Er þetta gert í framhaldi af blaðamannafundi stjórnvalda fyrr í dag en ljóst er að reglugerð um skólastarf er enn nokkuð óljós.
 
 
Ég bið ykkur um að fylgjsat með fréttum en einnig mun ég senda nánari upplýsingar þegar þær liggja fyrir

Föstudagur 30. október Hrekkjavökustemning

Hrekkjavaka G.Ö. 2019
Hrekkjavaka G.Ö. 2019
1 af 2

Heil og sæl 

Á föstudaginn ætlum við að hafa Hrekkjavökustemningu í grunnskólanum. Nemendur og starfsmenn eru hvattir til að koma í búningum af þessu tilefni.  Þennan sama dag ætlar Ævar vísindamaður að lesa fyrir okkur úr nýju bókinni sinni Mín eigin undirdjúp. Vegna aðstæðna kemur Ævar ekki til okkar heldur les hann og spjallar við okkur í gegnum fjarfundarbúnað.