Heil og sæl 

Meðal þess sem hefur verið í gangi hjá okkur í apríl er lestrarsprettur sem allir nemendur skólans taka þátt í. Hver og einn les í 20 mínútur heima og aðrar 20 mínútur í skólanum og er stefnan að safna upp í 10.000 mínútur. Umræður eru um bækur og höfunda og markmiðið að stuðla að lestraránægju sem leiði síðan af sér aukna lesfimi og lesskilning. 

Í síðustu viku fengu nemendur mið- og unglingastigs fræðslu í boði Vá Vest hópsins. Um var að ræða forvarnarfyrlestra sem  Magnúsar Stefánssonar sá um. Vegna aðstæðna var fræðslan í fjarfundi. Fundurinn með unglingunum var forvörn gegn vímuefnum og miðstigsnemendur fengu fyrirlestra um það sem ber að varast á netinu, einelti, samskipti barna og fleira.
Fyrirlestrar fyrir foreldra um sama efni voru haldnir um kvöld, einnig í fjarfundi. 

Forsáning er í fullum gangi innandyra og verða plöntur færðar út í beðin á skólalóðinni og settar niður kartöflur þegar við erum orðin nokkuð viss um að vorið sé komið. Við erum reyndar svo mikið fyrir allskonar tilraunir að við prófuðum til samanburðar að setja fræ beint út á sama tíma og við forsáðum því sem fær að þroskast inni. 

Nú hyllir undir það að umglingastigið komist í skólaferðalag og þar sem ekki verður af ferð út fyrir landssteinana var tekin ákvörðun um að fara hringveginn um Ísland. Eru nemendur að vinna að metnaðarfullu ferðaskipulagi þar sem á að skoða ýmislegt sem Ísland hefur upp á að bjóða. Hópurinn samanstendur af sjö ungmennum þar sem engin ferð var farin í fyrra og nemendur sem útskrifuðust þá frestuðu sinni ferð um ár. Þar sem eitthvað vantar upp á sjóðinn svo hægt sé að gera allt sem hugurinn girnist var ákveðið að ráðast í að gera skólablað og er það aldeilis eitthvað í reynslubankann. 

Það er ekkert óhefðbundið við það að sjá yngri nemendur skólans við hin ýmsu verkefni utandyra en með hækkandi sól og hlýrra veðri munum við verða mikið úti við námið á öllum stigum. 

Bestu kveðjur og góða helgi

Sunna
 

Heil og sæl 

Ný sóttvarnarreglugerð frá heilbrigðisráðherra tók gildi 1. apríl og gildir til og með 15. apríl. 

Með tilliti til hennar getum við haldið skólastarfi í leik- og grunnskóla með svipuðu sniði og við erum vön.

Undantekning er þó að nemendur á unglingastigi geta ekki sótt tíma á Ísafirði fram til 15. apríl og mæta því hér í skólann á morgun og næsta þriðjudag. 

Hér eru helstu punktar um gildandi sóttvarnir í leik og grunnskóla: 

Leikskólar

• Engin fjölda- eða nálægðartakmörkun gildir um börn á leikskólaaldri.
• Hámarksfjöldi fullorðinna er 20 manns í rými, en starfsmenn mega fara milli rýma.
• Starfsfólk skal virða 2 metra fjarlægðarreglu sín á milli en nota grímu ella.
• Viðburðir eru heimilir í skólastarfinu með þátttöku nemenda og starfsfólks en engum utanaðkomandi.
• Foreldrar og aðstandendur skulu ekki koma inn í skólabyggingar nema brýna nauðsyn beri til og skulu þá nota andlitsgrímu.

Grunnskólar

• Nemendur eru undanþegnir nálægðartakmörkun og grímuskyldu.
• Hámarksfjöldi starfsmanna er 20 manns í rými og þeir mega fara milli rýma.
• Starfsfólk skal virða 2 metra fjarlægðarreglu sín á milli og gagnvart nemendum en nota grímu ella.
• Viðburðir eru heimilir í skólastarfinu með þátttöku nemenda og starfsfólks en engum utanaðkomandi.
• Hámarksfjöldi nemenda í rými er 50 og blöndun milli hópa innan sama skóla er heimil.

Bestu kveðjur

Sunna

Það var þreyttur leikakrahópur sem tók lagið í lok leiksýningar sem fór fram fyrir framan myndvél í tómum sal.

Heil og sæl

Fréttir dagsins voru mikil vonbrigði þegar við héldum eða vonuðum allavega að allt færi að ganga í rétta átt í baráttunni við covid. Það tók samt ekki langan tíma að taka ákvörðun um að klára árshátíðina, sem við höffðum hlakkað mikið til að halda,  áður en skólahald yrði bannað um miðnætti. Haft var samband við Margeir Haraldsson sem var tilbúinn að koma og taka leikþáttinn upp í kvöld og síðan var haft samband við alla foreldra og tóku allir mjög vel í þetta. Krakkarnir stóðu sig með mikilli prýði eins og við höfðum vænst. Það var samt þreyttur hópur sem yfirgaf Samkomuhúsið þegar klukkan var langt gengin í ellefu en þá var upptökum lokið og allir höfðu fengið súpu og kökur áður en heim var haldið. 

Þegar klippingu verður lokið fáið þið að sjá afraksturinn af þessu skemmtilega leikriti sem byggir á ævintýrinu um Mjallhvíti og dvergana sjö. Handritið sömdu unglingarnir þrír og sáu einnig um utanumhald sýningarinnar með dyggum stuðningi starfsfólks. Þess má geta að við gerð leikmyndar og búninga var ákveðið að vinna samkvæmt Heimsmarkmiði nr. 12 um ábyrga neyslu og framleiðslu og var því pappír og fleira endurnýtt við gerð leikmyndarinnar og búnirngar voru úr geymslu skólans og gátum við okkur þess til að húfur dverganna hafi upphaflega verið jólasveinahúfur notaðar að árgangi 1959.  Allir nemendur höfðu hlutverk í sýningunni og fleiri þurfit til en slíku redda starfsmenn G.Ö. með glöðu geði. Ég læt ekki of margar myndir fylgja þessari frétt þar sem skemmtilegra er að halda spennunni. 

Allt skólahald fellur niður á morgun og föstudaginn og síðan tekur hið hefðbundna páskafrí við. Vonandi verður svo allt komið í samt lag þriðjudaginn 6. apríl og við getum byrjað með eðlilegum hætti. Nánari upplýsingar um það berast eftir 1. apríl. 

Bestu kveðjur og gleðilega páska

Sunna

« 1 af 3 »

Undirbúningur árshátíðarinnar er nú í fullum gangi og verður skólatíma þessa vikuna varið í æfingar, gerð leikmyndar og búninga og annan tilfallandi undirbúnig. 

Sýning verður svo í Samkomuhúsinu, fimmtudaginn 25. mars klukkna 18:00 og í framhaldinu ætlum við að skemmta okkur aðeins á Sílaballi. 

Nánari upplýsingar um fyrirkomulag sýningarinnar, skráningu gesta og fleira verða sendar eftir helgina. 

Nemendur unglingastigs hafa samið handrit eftir sögunni um Mjallhvít og dvergana sjö og rýnt í söguna með gagnrýnum augum. Yngri nemendur hafa samið dansa sem falla inn í sýninguna. 

Útkomuna verður skemmtilegt að sjá. 

Mér finnst rigningin góð :)

Á göngu niður Hafnarstrætið

Komin í anddyrið á vinnsluhúsi Vestfisks Flateyri

Þetta lítur úr eins og hið girnilegasta hlaðborð

Anton fræðir okkur um framleiðsluna og fyrirtækið

Svona er roðið þurrkað í stangir fyrir hunda

Það var gott að koma í þurrkklefann og leyfa fötunum aðeins að þorna eftir gönguna en þarna er um 30°C

Svo fórum við yfir í annað hús og fengum að vita allt um hornaframleiðsluna og hundaeigendur fengu horn eða bita úr hornum fyrir hundana sína, allt eftir hvað hentaði hvaða hundi.

Hornin áður en þau eru soðin

Fullunnin afurð úr hornunum.

« 1 af 10 »

Að þekkja sitt samfélag er öllum mikilvægt og er í Aðalnámskrá grunnskóla gerð grein fyrir þessum mikilvæga þætti í námi.  Ein leiðin sem við förum í skólastarfinu er að heimsækja þau fyrirtæki sem eru í þorpinu eða tengjast því á einhvern hátt. Með vettvangsheimsókn og fróðleik frá þeim sem starfa við fyrirtækin verður námið merkingarbærara.

Okkar fyrsta heimsókn þetta skólaárið var til Vestfisks á Flateyri sem nýlega hefur hafði framleiðslu á gæludýrafóður úr afurðum sem falla til við sjávarútveg og landbúnað og væru jafnvel ekki nýttar á annan hátt. Meðal hráefnis er roð, bein, rækjuskel  og horn. Ýmsar skemmtilegar vörur eru framleiddar úr þessu hráefni og tala meðfylgjandi myndir sínu máli þar um. Nemendur og starfsmenn hlustuðu af athygli og fengum við að smakka eina afurðina sem var eins og snakk úr rækjuskel. Við erum að vinna út frá Heimsmarkmiði nr 12 um ábyrga neyslu og framleiðslu og var þessi heimsókn svo sannralega í anda þess markmiðs. 

Eftir páskana munum við halda áfram að heimsækja fyrirtæki og fræðast um starfsemi þeirra. 

« 1 af 10 »

Þessa viku hafa allir dagar hafist á leiklistaræfingum sem kemur sér vel í aðdraganda árshátíðarvikunnar. Steinunn Ása sem hefur verið í vettvangsnámi hjá okkur í tvær vikur hefur stjórnað ýmsum æfingum sem reyna á hlustun, rýmisgreind, einbeitingu, líkamsbeitingu, samvinnu, traust og framkomu. 

Krakkarnir hafa lært að vinna út frá spuna, í byjun því sem kallað er frostspuni og síðan að búa til sinn karakter út frá búningi og að lokum að lesa handrit og setja síðan upp spunaþátt sem byggir á handritinu. 

Það var virkilega gaman að fylgjast með þessari vinnu og heyra hljóðið í nemendum í lokin þar sem þeir voru almennt mjög ánægðir. 

Meðfylgjandi myndir segja svo meira en mörg orð. 

Heil og sæl

Hvar á að byrja þegar segja á fréttir af fjölbreyttu skólastarfi? 

Í síðustu viku var Steinunn Ása kennaranemi hjá okkur og fylgdist með og tók þátt í starfi á yngsta stigi með Jónu Láru. Meðal þess sem yngsta stigið hefur verið að fást við eru mynstur í stærðfræði og bjuggu nemendur m.a. til sinn eigin flugdreka. Í næstu viku verður vonandi hagstætt veður til að koma drekunum á loft. Kennsla fór einnig fram utanhúss að vanda og var farið og leitað að mynstri í umhverfinu og búnar til mandölur úr hlutum í umhverfinu. Ættartré sem nemendur hafa verið að vinna eru nú komin upp á vegg. Samvinnuverkefnið sem nú er að fara í gang á yngsta stigi er bygging Leonardo da Vince brúar. Það er sko alltaf gaman að fylgjast með framkvæmdagleðinni og öllu því námi sem á sér stað. Hvaða mannvirki birtist hér fyrir utan verður gaman að sjá. 

Á miðstiginu gengur skólastarf sinn vanagang. Þar fylgjsat nemendur áfram með fréttum, sérstaklega varðandi jarðhræringarnar á Reykjanesskaganum og tengja við námsefnið. Þau hafa einng verið að vinna út frá Heimsmarkmiði nr. 14 ,,líf í vatni" og fóru meðal annaras í vettvangsferð og tóku sýni úr sjónum á nokkrum stöðum til að mæla og skoða nánar. Sýrustigsmælingarnar voru einnig samþættar því sem þau hafa verið að vinna með mannslíkamann og ýmsir vökvar, flestir drykkjarhæfir, voru mældir og í dag sameinuðust mið og unglingastig um tilraunir með sýrustig og m.a. áhrif þess á kalk. Á unglingastiginu eru nemendur einnig að skrifa stutta ritgerð og afla sér upplýsinga um afleiðingar súrnunar hafsins 

Undirbúningur árshátíðarinnar er kominn á skrið og eru stelpurnar á unglingastigi að skrifa handritið með dyggri aðstoð Steinunnar Ásu. Í næstu viku ætlar Steinunn Ása svo að hefja hvern dag með leiklistaræfingum þar sem allur skólinn mun vinna saman. Verður þar farið í framkomu, framsögu og sitthvað fleira sem gagnast ekki síður í lífinu almennt en bara á leiksviðinu. Við hlökkum til að bæta við okkur hæfni sem hlýst af þessari reynslu. 

Sem betur fer stoppaði veður ekki ferð unglinganna á Rósaball þetta árið og var það eflaust hápunktur vikunnar hjá þeim. 

Þessari góðu skólaviku lauk með vöfflubakstri sem unglingastigið sá um og nutu allir góðs af áður en haldið var í helgarfrí að loknum hádegisverði. 

Framundan er vinna út frá Heimsmarkmiði nr. 12 ,,Ábyrg neysla og framleiðsla". 

Heil og sæl

Nú hafa nemendur og starfsfólk tekið til starfa á ný að loknu vetrarfríi sem vonandi hefur nýst öllum vel til að hlaða batteríin.

Við tökum nýjum tilslökunum á takmörkunum í skólastarfi og samkomuhaldi fagnandi þar sem nú er útlit fyrir að við getum haldið árshátíðina okkar með nokkuð eðlilegum hætti en hún er á skóladagatalinu 25. mars næstkomandi. Undirbúningur fer af stað fljótlega.

Annar kostur við tilslakanirnar er að nú má á nýjan leik halda skólaböll og hefur unglingunum þegar verið boðið á Rósaballið sem haldið verður á Ísafirði fimmtudaginn 11. mars.

Næstu þrjár vikurnar verður Steinunn Ása í vettvangsnámi hjá okkur en hún er í MT námi í kennslu list- og verkgreina með leiklist sem kjörsvið. Við hlökkum til að taka á móti henni og nýta hennar krafta við okkar góða og skapandi skólastarf.

Hér eru atburðir líðandi stundar gripnir til aukinnar umræðu og skilnings. Sem dæmi má nefna að nemendur miðstigi hafa undanfarið verið að vinna með jörðina,  eldvirkni, flekaskil og jarðskjálfta og voru fréttir af jarðhræringunum á Reykjanesi undanfarna daga nýttar til að velta upp hinum ýmst hugtökum sem þeim tengjast.

Yngsta stig hefur verið að vinna með líkamann að undanförnu og gert ýmislegt verklegt því tengt og voru núna í vikunni að búa til eftirlíkingu af lungum. Í vikunni luku mið- og yngsta stig samvinnu þar sem búin voru til ,,operation spil” en í þeirri vinnu sameinaðist fróðleikur um líkamann og það hvernig rafrásir virka. Tilraunatímar yngsta stigsins eru nokkuð reglulega og voru þau í dag að búa til kristalla úr salti og sykri og verður spennandi að fylgjast með afrakstrinum í næstu viku.

Á öllum stigum er lesið, skrifað, unnið í Ipad og tölvu og leitast við að nálgast viðfangsefnin á sem fjölbreyttstan hátt.

Til viðbótar við það mat á námi nemenda sem kennarar vinna höfum við að undanförnu verið að kynna nemendum unglingastigs sjálfsmat í mentor þar sem þeir geta farið yfir hæfniviðmiðin og merkt við hvar þeir eru staddir og eru þá ekki bundnir við að hafa náð þeirri hæfni innan veggja skólans því allsstaðar erum við eitthvað að læra.

Formlegri sundkennslu þetta skólaárið er nú lokið og við taka ýmsar íþróttir inni og úti.

Bestu kveðjur og góða helgi

Sunna

« 1 af 10 »

Nú er febrúar hálfnaður og ýmislegt búið að ávinnast í námi í Grunnskóla Önundarfjarðar. 

Í námi utan skólahúss má nefna að í síðustu viku fórum við í skíðaferð í Tungudal. Í þessari ferð kom í ljós ýmis hæfni sem nemendur búa yfir og má þar fyrst nefna seiglu og þrautseigju. Þessa eiginleika reyndi meðal annars á við að ná tökum á því að taka lyftuna á skíðum eða á bretti. Einnig reyndi á þessa hæfni þegar farið var á toppinn og þurfti að finna réttu leiðina niður eða hjálpa þeim sem lentu í erfiðleikum. Það má nefna svo marga aðra styrkleika sem komu fram og nemendur gátu tínt til við upprifjun á ferðinni; þolinmæði, styrk, þol, hjálpsemi og jafnaðargeð svo eitthvað sé nefnt.

Fimmtudaginn 11.2 fórum við aftur út fyrir skólalóðina til að læra og í þetta skiptið til að kynnast starfsemi Björgunarsveitarinnar Sæbjargar í tilefni af 112 deginum sem haldinn er ár hvert til að minna á neyðarnúmerið. Fyrst fórum við á leikskólann þar sem verið var að færa yngstu börnunum sýninguna heim og síðan héldu grunnskólanemendur ásamt eldri hópi leikskólans áfram í nýja björgunarsveirarhúsið. Þar fengu nemendur smá fróðleik um tilgang dagsins og björgunarsveitina og að lokum fengu þau að skoða tæki sveitarinnar. Þess má einnig geta að 112 dagurinn þetta árið er helgaður öryggi og velferð barna og ungmenna og fengu allir foreldrar póst frá skólahjúkrunarfræðingi með nánari upplýsingum þar um. 

Viðtöl nemenda, foreldra og kennara fóru fram í síðustu viku. Þar var staðan tekin með áherslur á framhaldið að leiðarljósi. 

Á miðvikudaginn, 17. febrúar, er starfsdagur og munum við þá vinna ýmis verkefni í skólahúsnæðinu og meðal annars fara yfir áætlanir okkar og skerpa línurnar í því hvernig við höldum áfram veginn með áherslur á lykilhæfni og aukna þátttöku nemenda í mati og áherslum í sínu eigin námi.

Fimmtudagurinn 18. og föstudagurinn 19. febrúar verða vetrarfrísdagar. Ég vona að allir njóti þeirra daga og komi endurnærðir til náms mánudaginn 22. febrúar. 

Bestu kveðjur 

Sunna