Í Grunnskólanum á Flateyri er fjölbreytt og lifandi skólastarf. Við byrjum alla morgna á lestrarþjálfun og yndislestri en undanfarið höfum við unnið markvisst með 100 – 200 algengustu orðin af síðunni 100ord.is. Nemendur lesa orðin fyrir kennara sem skráir tímann og er þetta gert daglega. Við hvetjum forráðamenn til að prófa þessa æfingu einnig heima.

Alla miðvikudaga er það sem við köllum 10 mínútna ritun þar sem nemendur velja á milli tveggja hluta sem á að skrifa um t.d. íþróttahús eða sundlaug, þau eiga að lýsa hlutnum án þess að nefna hann á nafn. Þetta getur verið vandasamt en er mjög góð æfing í að koma hugsunum um eitthvað ákveðið frá sér og niður á blað. Nemendur eiga hver sína stílabók eingöngu fyrir þetta ritunarverkefni og það verður áhugavert að fylgjast með því hvernig þróunin og framfarirnar verða.
Við ræddum um orðið, viðhorf, og hvað það þýddi. Það komu ýmsar hugmyndir fram t.d. að horfa saman (við horfum), en í sameiningu fundum við út að það þýðir með hvaða huga við tökumst á við verkefni í leik og starfi. Við vorum sammála um að ákveða ekki fyrirfram að eitthvað væri erfitt og leiðinlegt heldur frekar að nálgast viðfangsefnin með jákvæðu viðhorfi.

Ræktunarárið er svo sannarlega byrjað hjá nemendum GÖ en það byrjaði hressilega síðastliðinn nóvember þegar dægradvöl gróðursetti tvö yrki af hvítlauk í bambahúsið.
Hvítlaukur þarf kuldatímabil til að mynda nýja geira en hann þarf að liggja í moldinni í heilt ár frá hausti til hausts til að verða myndarlegur. Okkur til mikillar undrunar kom hitabylgja í desember og hvítlaukurinn okkar fór af stað ótímabært. Spennandi að sjá hvort þeir nái að lifa fram að næsta hausti. Hugmyndir nemendanna eru mjög spennandi en metnaðarfyllsta hugmyndin er melónuræktun. 

Bambahúsið verður stútfullt af tilraunum í sumar og hvetjum við öll að kíkja þar við og sjá hvað er í boði. Tegundirnar eru margar en á næstu misserum byrjar forræktun á næpum, káljurtum af ýmsum sortum, ertum og baunum, tómötum, gúrkum, sólblómum, jarðskokkum og öðrum nytjablómum. 

Í list og verkgreinum er annarþemað neysla, nýting, nýsköpun og ræðum við þessi orð í upphafi hvers tíma. Öll verkefni annarinnar tengjast þessum orðum á einhvern hátt en fyrsta verkefnið var að búa til tambúrínu úr víðigreinum og áltöppum af glerflöskum. Hamraborg styrkti okkur með áltöppunum og voru þeir þrifnir vel fyrir kennsluna.

Núna erum við að einbeita okkur að textíl. Allir nemendurnir lærðu að lesa miðana á fötunum sínum til að sjá úr hverju þau eru búin til og eins og okkur grunaði var polyester í öllum flíkunum. Þau lærðu muninn á dýratrefjum (t.d. ull og silki) og jurtatrefjum (t.d. bómull og hör). Orðin tog, þel, halasnælda og kambur voru tekin fyrir og fengu öll að prófa að spinna þráð úr þeli sem þau skildu sjálf frá toginu.
Á næstu misserum munum við læra að lita textíl með jurtum úr nærumhverfinu. Í jurtalituninni munum við læra gamlar aðferðir og ræða mikilvægi þess að varðveita kunnáttu forfeðra okkar. 

Við hlökkum til áframhaldandi spennandi skólastarfs með nemendum okkar í GÖ.

Áfram Ísland

« 1 af 3 »

Vikupóstur frá nemendum

Við vorum að kveikja eld og skauta. Við skrifuðum óskir og brenndum þær á bálinu. Við vorum að leika í snjónum. Hjá skautasvellinu fengum við heitt súkkulaði sem Jóna bjó til. Við unnum mörg hópaverkefni til dæmis að skrifa sögu í sameiningu þar sem við áttum að skrifa um sérstaka hluti og í dag gerðum við verkefni um hvernig okkur geti liðið vel í skólanum. Við skrifuðum öll um jólafríið. Jólaskrautið var tekið niður og sett í geymslu. Nokkur fóru í Asna í körfubolta, snjóbolta og snjóboltastríð. Við vorum að skauta í íþróttum og fórum í sund. Í nestistímanum var byrjað að lesa bók sem heitir: Skólastjórinn eftir Ævar Þór Benediktsson. Hún er mjög góð og okkur langar að heyra meira.

Góða helgi frá nemendum í GÖ

« 1 af 6 »

Þessar síðustu vikur hafa að mestu einkennst af vinnu við jólaverkefnið sem er samstarfsverkefni skólanna á Þingeyri, Flateyri og Suðureyri. Nemendur eru nú að leggja lokahönd á verkefnin sín sem verða sett upp á sýningu í Safnahúsinu á Ísafirði og er mikil tilhlökkun. Yngstu nemendurnir, í 1.–2. bekk, hafa unnið fjölbreytt verkefni í íslensku, samfélagsfræði og list- og verkgreinum þar sem þau hafa meðal annars búið til jólasvein, lært og samið ljóð, fræðst um jólahefðir og tekið viðtöl um mismunandi venjur. Nemendur í 4.–7. bekk hafa unnið með jól í öðrum löndum og hafa nemendur safnað upplýsingum um jólamat, skreytingar, trú og tónlist og sett afraksturinn fram á plaköt sem fara bæði á sýninguna og á heimasíðu skólans. Framundan er síðasta vikan fyrir jól þar sem eitthvað verður um uppbrot og jólastúss. Það hefur verið hefð við skólann að skrifa jólakort og ætlum við ekki að breyta útaf þeirri hefð. Annað sem verður á dagskrá er t.d. piparkökuhúsabakstur, Tarzan leikur í íþróttahúsinu, jólaball í leikskólanum og að lokum dýrindis jólamatur á Gunnukaffi. 

Njótið vikunnar

« 1 af 10 »

Viðfangsefni vikunnar voru virkilega fjölbreytt eins og venjulega (Hvað eru mörg vöff í því?)
Skógarferðin var mjög skemmtileg þar sem kveikt var bál á eldstæðinu, farið í leiki og síðast en ekki síst, tilgangur ferðarinnar sem var að saga/höggva jólatré. Úthald og þrautsegja nemenda er alltaf að eflast og er það lítið mál fyrir þau að labba ,,alla leið" út í skóg og til baka.
Í gær var dagur mannréttinda barna sem er haldinn vegna þess að 20. nóvember árið 1989 var Barnasáttmálinn samþykktur á þingi Sameinuðu þjóðanna. Af því tilefni vorum við öll saman í kennslustund þar sem við ræddum m.a. um hvað hugtakið mannréttindi þýðir og voru margar góðar hugmyndir um það til dæmis: Reglur, sýna virðingu, mega gera eitthvað, fá mat og vatn, hvíld og svefn og það má segja nei! Í lokin horfðum við saman á fræðslumyndbönd um Barnasáttmálann.
Börnin hafa æft jólalög af kappi í vikunni sem þau ætla svo að syngja þegar ljósin verða tendruð á jólatrénu á sunnudaginn kl.16. Þau æfðu með nemendum leikskólans í gær og eru því aldeilis klár í slaginn. 
Ég minni í lokin á starfsdaginn á mánudaginn.
Góða helgi og hlökkum til að sjá ykkur á sunnudaginn.

Vasaljósalestur

« 1 af 11 »

Samstarfsverkefni fámennu skólanna heldur áfram í ár og erum við þessa stundina að leggja lokahönd á þemað okkar um fuglana. Við byrjuðum verkefnið á því að hittast hérna á Flateyri og fara í fuglagöngu, en listakonan Jean Larson hefur nú málað um 18 fugla á húsveggi á Flateyri. Nemendurnir völdu sér öll fugl og hafa sérhæft sig í sínum fugli og aflað sér upplýsinga um hann. Merkt leið farfugla á landakort – lært að vinna í Canva og búa til veggspjald – búa til námsvegg um fuglaVerkefninu lýkur með sýningu og kynningu á fuglunum og eru þau núna að leggja lokahönd á fuglinn sinn sem þau búa til sjálf.

Nemendur munu svo halda sýningu á verkum sínum á kaffihúsakvöldinu okkar sem verður 4. desember en þar ætla þeir nemendur sem stunda tónlistarnám einnig að vera með tónleika.

Við leggjum mikla áherslu á að lestur sé bæði skemmtilegur og lærdómsríkur. Nemendur velja sér bækur sem vekja áhuga þeirra og þessa stundina er það “skiptilestur” sem hefur vakið mesta spennu og gleði. Öll með sitthvora bókina og skiptast á að lesa að punkti.
Þegar lesið er saman skapast góð stemning og allir fá tækifæri til að æfa lestur á öruggan og jákvæðan hátt.

Umhverfisvitund og útinám eru fastur og mikilvægur hluti af starfi Grunnskóla Önundarfjarðar. Þess vegna er frábært að tilkynna að við skólann hefur verið komið upp nýju Bambahúsi til útikennslu og ræktunar.

Við erum hæstánægð með að fá húsið strax að hausti þar sem við erum nú þegar búin að koma hvítlauknum niður og hefja ræktunarstarfið.

Ég vil nýta tækifærið og þakka Búaðstoð kærlega fyrir en hann Valli gaf okkur moldina í Bambahúsið. Takk

Hugrún Britta sem sér um dægradvölina hjá okkur er frábær viðbót við starf okkar. Við hlökkum til að endurvekja gróðurkassana undir hennar stjórn og það verður mjög spennandi að sjá hvað þeim dettur í hug að rækta. Ég er allavegana mjög spennt því að ég veit nefnilega að það er komin gróðumerkimiði sem stendur á ”melóna”.

Góða helgi og hlýjar kveðjur frá okkur í GÖ

Skólaslit skólans okkar verða á morgun þriðjudaginn 3. júní kl 17:00. Verða þau með hátíðlegum brag og boðið upp á kaffi og köku. Hlökkum til að sjá ykkur. 

Gestirnir voru öll mjög áhugasöm

Gumbi að fræða okkur um örnefnið Merarhvamm sem er inni í A-inu

Líkönin skoðuð vel og fengu nemendur spurningar frá gestunum.

« 1 af 15 »

Vel heppnuðu skólaþingi lokið og mikið agalega var ég stolt af mínu fólki.

Betri heimabyggð –Skapandi nemendur með skoðanir á nærumhverfi sínu.

Síðasta þemaverkefni þessa skólaárs var verkefni sem bar yfirheitið Betri heimabyggð.

Nemendurnir byrjuðu á því að kynna sér nærumhverfi sitt og tóku myndir af því sem þeim  fannst gott og hvað mætti betur fara. Þau áttu síðan að láta sig dreyma um það hvernig mætti bæta þorpið þeirra - hvað fannst þeim vanta á Flateyri.

Þeir skrifuðu texta við myndirnar, bjuggu til líkön af hugmyndum sínum og notuðu til þess endurnýtanlegt efni. Í lok verkefnisins buðu þau foreldrum, sviðstjóra skóla- og tómstundasviðs, bæjarstjóra, bæjarstjórn og Hverfaráði Önundarfjarðar á skólaþing þar sem þau kynntu niðurstöður sínar og hugmyndir að úrbótum.

Verkefnið styrkti margvíslega færni nemenda – tjáningu, skapandi hugsun, samvinnu, gagnrýna hugsun og lýðræðislega þátttöku. Skólaþingið var afar vel heppnað og er gaman að segja frá því að strax sama dag bárust þær fréttir að búið væri að laga göngustíg sem nemendur höfðu einmitt tekið mynd af – eitthvað sem mætti betur fara. Gaman fyrir nemendur að sjá að þau geti haft áhrif í samfélaginu (þrátt fyrir að í þessu tilfelli hafi þetta trúlega verið mjög skemmtileg tilviljun).

Sólargangan

Skógarsvæðið okkar er algjör draumur. Takk Lýðskóli.

Magga Messi og Orri óstöðvandi

Draumar barna :)

« 1 af 7 »

Það hefur verið aðeins um uppbrot þessa vikuna eins og gengur og gerist í maí. Hin árlega sólarganga leikskólans Grænagarð og grunnskólans var farin núna 7. maí í ekta íslensku vorveðri. Það var frekar hvasst og rigndi aðeins á okkur en auðvitað lét sólin líka sjá sig. Að venju voru öll full jákvæðni og enduðum við gönguna á pylsupartýi í leikskólanum.

Á fimmtudaginn bauð Þjóleikhúsið miðstigi grunnskólanna á leiksýningu byggða á hinum geysivinsælu bókum um Orra óstöðvandi og vinkonu hans Möggu Messi eftir Bjarna Fritzson.

https://leikhusid.is/syningar/orri-ostodvandi/

Í dag fóru Sigga og Siggi með nemendurna í gönguferð inní skóg. Þau voru búin að nesta sig fyrir ferðina með skólabökuðum pizzasnúðum og swiss miss. Veðurspáin var nú ekkert frábært og snjóaði allsvakalega á okkur í morgun en bæði nemendur og kennarar komu mjög vel búin og jákvæð í skólann í morgun og tilbúin í þessa gönguferð. Þau komu öll kampakát en smá blaut til baka en það er rétt sem sagt er - Það er ekki til vont veður – bara óviðeigandi klæðnaður!

Síðasta þemaverkefni þessa skólaárs heitir Betri heimabyggð. Nemendur kynntu sér nærumhverfið sitt, tóku myndir og ræddu kosti og galla samfélagsins í kringum sig. Þau áttu síðan að láta sig dreyma um það hvernig mætti bæta þorpið þeirra, hvað fannst þeim vanta á Flateyri. Þau eru núna í óða önn að klára líkönin af því sem þeim fannst vanta og eiga svo að rökstyðja hugmyndina sína með texta. Verkefninu lýkur með skólaþingi þar sem nemendur bjóða bæjar- eða sveitastjórn að hlýða á hugmyndir sínar um að bæta samfélagið.

Njótið helgarinnar

« 1 af 6 »

Árshátíð skólans var núna 9. apríl og stóðu krakkarnir sig frábærlega vel. Þau voru búin að leggja á sig mikla vinnu og uppskáru heldur betur eins og þau sáðu, mikil ánægja og fengu þau mikið og verðskuldað hrós.

Nemendur á miðstigi sendu einnig inn hugmyndir sínar í Nýsköpunarkeppni grunnskólanna. Annarsvegar „Veiðihjólastand “ og hinsvegar „Kattaferðastand“. Hugmyndin verður þróuð áfram í samstarfi við FabLab og aldrei að vita nema að þið sjáið auglýstar vörur til sölu innan skamms.

Barnamenningarhátíðin Púkinn var þessa vikuna og sóttu nemendur GÖ viðburði tengda henni.

Leikkonan Birgitta Birgisdóttir bauð nemendum á miðstigi í öfluga og skapandi leiklistarsmiðju, þar sem unnið var eftir aðferðum Theatre of the Oppressed. Í smiðjunni fengu nemendur að kanna eigin rödd, tjá sig í gegnum leiklist og takast á við raunveruleg viðfangsefni á kraftmikinn og skapandi hátt.

Frach bræður komu í Flateyrarkirkju með tónleikadagskrána Árstíðir fyrir nemendur frá Flateyri og Þingeyri. Mögnuð upplifun fyrir krakkana sem spiluðu Vivaldi hérna í morgunsárið og rifjuðu upp góða takta hjá bræðrunum. Topp fyrirmyndir.

Í byrjun mars tóku unglingastigin úr grunnskólunum á Flateyri, Suðureyri og Þingeyri þátt í Krakkar Filma! námskeiði UngRIFF. Þau unnu fimm stuttmyndir byggðar á vestfirskum þjóðsögum undir handleiðslu leikstjórans Erlings Óttars Thoroddsen. Nemendur GÖ fengu að sjá afraksturinn í dag og vöktu þær mikla lukku og voru þau mjög áhugasöm.

Síðasti dagur fyrir páskafrí var óhefðbundinn – páskaföndur – 52 spil – borðspil – píla – fótbolti og síðast en ekki síst PÁSKAEGGJALEIT. Í dægradvöl hélt þessi notalega setmmning áfram með poppi og bíómynd.

Góða páska til ykkar allra

« 1 af 3 »

Í vikunni barst skólanum vegleg bókagjöf frá Sjón og Bókmenntahátíð Flateyrar 2025. 

Bókmenntahátíð Flateyrar varð til í hjarta Karíba, sjálfstæðs forlags með aðsetur á Flateyri. Hugmyndin að þessari hátíð er að færa rithöfunda og lesendur saman í afskekkta þorpinu Flateyri, sem er staðsett í hinum stórbrotna Önundarfirði. Hátíðin var í fjóra daga þar sem bókmenntum og fjölbreytileika var fagnað með fjölbreyttri dagskrá fyrir börn og fullorðna. 

Við í skólanum erum auðvitað afar þakklát fyrir þessa góðu gjöf enda mikilvægt að vera með fjölbreytt bókaúrval í skólanum.

Auk þeirra gaf Sindri Sparkle okkur bókina sína "Room for Everyone" Saga hinsegin fánans.

Við þökkum Sjón, Bókmenntahátíð Flateyrar (Helen Hafgnýr Cova) og Sindra kærlega fyrir