Heil og sæl

Hvar á að byrja þegar segja á fréttir af fjölbreyttu skólastarfi? 

Í síðustu viku var Steinunn Ása kennaranemi hjá okkur og fylgdist með og tók þátt í starfi á yngsta stigi með Jónu Láru. Meðal þess sem yngsta stigið hefur verið að fást við eru mynstur í stærðfræði og bjuggu nemendur m.a. til sinn eigin flugdreka. Í næstu viku verður vonandi hagstætt veður til að koma drekunum á loft. Kennsla fór einnig fram utanhúss að vanda og var farið og leitað að mynstri í umhverfinu og búnar til mandölur úr hlutum í umhverfinu. Ættartré sem nemendur hafa verið að vinna eru nú komin upp á vegg. Samvinnuverkefnið sem nú er að fara í gang á yngsta stigi er bygging Leonardo da Vince brúar. Það er sko alltaf gaman að fylgjast með framkvæmdagleðinni og öllu því námi sem á sér stað. Hvaða mannvirki birtist hér fyrir utan verður gaman að sjá. 

Á miðstiginu gengur skólastarf sinn vanagang. Þar fylgjsat nemendur áfram með fréttum, sérstaklega varðandi jarðhræringarnar á Reykjanesskaganum og tengja við námsefnið. Þau hafa einng verið að vinna út frá Heimsmarkmiði nr. 14 ,,líf í vatni" og fóru meðal annaras í vettvangsferð og tóku sýni úr sjónum á nokkrum stöðum til að mæla og skoða nánar. Sýrustigsmælingarnar voru einnig samþættar því sem þau hafa verið að vinna með mannslíkamann og ýmsir vökvar, flestir drykkjarhæfir, voru mældir og í dag sameinuðust mið og unglingastig um tilraunir með sýrustig og m.a. áhrif þess á kalk. Á unglingastiginu eru nemendur einnig að skrifa stutta ritgerð og afla sér upplýsinga um afleiðingar súrnunar hafsins 

Undirbúningur árshátíðarinnar er kominn á skrið og eru stelpurnar á unglingastigi að skrifa handritið með dyggri aðstoð Steinunnar Ásu. Í næstu viku ætlar Steinunn Ása svo að hefja hvern dag með leiklistaræfingum þar sem allur skólinn mun vinna saman. Verður þar farið í framkomu, framsögu og sitthvað fleira sem gagnast ekki síður í lífinu almennt en bara á leiksviðinu. Við hlökkum til að bæta við okkur hæfni sem hlýst af þessari reynslu. 

Sem betur fer stoppaði veður ekki ferð unglinganna á Rósaball þetta árið og var það eflaust hápunktur vikunnar hjá þeim. 

Þessari góðu skólaviku lauk með vöfflubakstri sem unglingastigið sá um og nutu allir góðs af áður en haldið var í helgarfrí að loknum hádegisverði. 

Framundan er vinna út frá Heimsmarkmiði nr. 12 ,,Ábyrg neysla og framleiðsla". 

Heil og sæl

Nú hafa nemendur og starfsfólk tekið til starfa á ný að loknu vetrarfríi sem vonandi hefur nýst öllum vel til að hlaða batteríin.

Við tökum nýjum tilslökunum á takmörkunum í skólastarfi og samkomuhaldi fagnandi þar sem nú er útlit fyrir að við getum haldið árshátíðina okkar með nokkuð eðlilegum hætti en hún er á skóladagatalinu 25. mars næstkomandi. Undirbúningur fer af stað fljótlega.

Annar kostur við tilslakanirnar er að nú má á nýjan leik halda skólaböll og hefur unglingunum þegar verið boðið á Rósaballið sem haldið verður á Ísafirði fimmtudaginn 11. mars.

Næstu þrjár vikurnar verður Steinunn Ása í vettvangsnámi hjá okkur en hún er í MT námi í kennslu list- og verkgreina með leiklist sem kjörsvið. Við hlökkum til að taka á móti henni og nýta hennar krafta við okkar góða og skapandi skólastarf.

Hér eru atburðir líðandi stundar gripnir til aukinnar umræðu og skilnings. Sem dæmi má nefna að nemendur miðstigi hafa undanfarið verið að vinna með jörðina,  eldvirkni, flekaskil og jarðskjálfta og voru fréttir af jarðhræringunum á Reykjanesi undanfarna daga nýttar til að velta upp hinum ýmst hugtökum sem þeim tengjast.

Yngsta stig hefur verið að vinna með líkamann að undanförnu og gert ýmislegt verklegt því tengt og voru núna í vikunni að búa til eftirlíkingu af lungum. Í vikunni luku mið- og yngsta stig samvinnu þar sem búin voru til ,,operation spil” en í þeirri vinnu sameinaðist fróðleikur um líkamann og það hvernig rafrásir virka. Tilraunatímar yngsta stigsins eru nokkuð reglulega og voru þau í dag að búa til kristalla úr salti og sykri og verður spennandi að fylgjast með afrakstrinum í næstu viku.

Á öllum stigum er lesið, skrifað, unnið í Ipad og tölvu og leitast við að nálgast viðfangsefnin á sem fjölbreyttstan hátt.

Til viðbótar við það mat á námi nemenda sem kennarar vinna höfum við að undanförnu verið að kynna nemendum unglingastigs sjálfsmat í mentor þar sem þeir geta farið yfir hæfniviðmiðin og merkt við hvar þeir eru staddir og eru þá ekki bundnir við að hafa náð þeirri hæfni innan veggja skólans því allsstaðar erum við eitthvað að læra.

Formlegri sundkennslu þetta skólaárið er nú lokið og við taka ýmsar íþróttir inni og úti.

Bestu kveðjur og góða helgi

Sunna

« 1 af 10 »

Nú er febrúar hálfnaður og ýmislegt búið að ávinnast í námi í Grunnskóla Önundarfjarðar. 

Í námi utan skólahúss má nefna að í síðustu viku fórum við í skíðaferð í Tungudal. Í þessari ferð kom í ljós ýmis hæfni sem nemendur búa yfir og má þar fyrst nefna seiglu og þrautseigju. Þessa eiginleika reyndi meðal annars á við að ná tökum á því að taka lyftuna á skíðum eða á bretti. Einnig reyndi á þessa hæfni þegar farið var á toppinn og þurfti að finna réttu leiðina niður eða hjálpa þeim sem lentu í erfiðleikum. Það má nefna svo marga aðra styrkleika sem komu fram og nemendur gátu tínt til við upprifjun á ferðinni; þolinmæði, styrk, þol, hjálpsemi og jafnaðargeð svo eitthvað sé nefnt.

Fimmtudaginn 11.2 fórum við aftur út fyrir skólalóðina til að læra og í þetta skiptið til að kynnast starfsemi Björgunarsveitarinnar Sæbjargar í tilefni af 112 deginum sem haldinn er ár hvert til að minna á neyðarnúmerið. Fyrst fórum við á leikskólann þar sem verið var að færa yngstu börnunum sýninguna heim og síðan héldu grunnskólanemendur ásamt eldri hópi leikskólans áfram í nýja björgunarsveirarhúsið. Þar fengu nemendur smá fróðleik um tilgang dagsins og björgunarsveitina og að lokum fengu þau að skoða tæki sveitarinnar. Þess má einnig geta að 112 dagurinn þetta árið er helgaður öryggi og velferð barna og ungmenna og fengu allir foreldrar póst frá skólahjúkrunarfræðingi með nánari upplýsingum þar um. 

Viðtöl nemenda, foreldra og kennara fóru fram í síðustu viku. Þar var staðan tekin með áherslur á framhaldið að leiðarljósi. 

Á miðvikudaginn, 17. febrúar, er starfsdagur og munum við þá vinna ýmis verkefni í skólahúsnæðinu og meðal annars fara yfir áætlanir okkar og skerpa línurnar í því hvernig við höldum áfram veginn með áherslur á lykilhæfni og aukna þátttöku nemenda í mati og áherslum í sínu eigin námi.

Fimmtudagurinn 18. og föstudagurinn 19. febrúar verða vetrarfrísdagar. Ég vona að allir njóti þeirra daga og komi endurnærðir til náms mánudaginn 22. febrúar. 

Bestu kveðjur 

Sunna

Mánudagur 8. febrúar

Fiskur með eplum og ananas, hrísgrjón og salat

Þriðjudagur 9. febrúar

Lasanja

Miðvikudagur 10. febrúar

Fjölkorna fiskur, kartöflur, lauksmjör og salat

Fimmtudagur 11. febrúar 

Indverskur kjúklingaréttur, hrísgrjón og salat

Föstudagur 12. febrúar

Skyr og smurt brauð

« 1 af 7 »

Nú er tími Þorrablótanna og héldu nemendur og starfsmenn sitt Þorrablót á bóndadaginn. 

Hver námshópur sá um sín skemmtiatriði sem voru vel undirbúin. Unglingarnir og miðstigið gerðu góðlátlegt grín, eins og tíðkast í annálum, bæði að höfundum sjálfum og starfsmönnum og settu fram í myndböndum. Yngsta stigið sýndi ýmis skemmtiatriði á staðnum og síðan var brugðið á leik þar sem nemendur og starfsmenn voru þátttakendur. Að lokum var borðhald þar sem snæddur var þorramatur og nemendavísur sungnar. Þessi dagur og undanfari hans reyndi á hin ýmsu hæfniviðmið nemenda. 

Þá eru fyrstu tvær vikur ársins að baki og hefur miklu verið áorkað sem fyrri daginn. 

Jólin voru kvödd á þrettándanum með því að grafa upp eldstæðið og kveikja á því lítið bál. Nemendur og starfsmenn höfðu undirbúið litla athöfn þar sem ýmislegt frá árinu 2020 sem þeir vildu brenna að baki var skrifað á miða sem settur var á bálið. Þegar allt frá árinu 2020 var komið á bálið fóru á það miðar með væntingum til ársins 2021 sem fóru þá út í alheiminn. 

Stundaskráin hefur aftur verið færð til þess fyrirkomlags sem var fyrir takmarkanir og geta unglingarnir nú sótt sína valtíma og þriðjudagsnám á Ísafjörð eins og var í upphafi skólaárs sem vekur mikla lukku. Yngri nemendur fundu ekki fyrir neinni skerðingu í skólastarfi þó ýmsar tilfærslur hafi þurft að gera sem eru þá aftur komnar í rétt form núna. 

Í náminu er verið að vinna með ýmislegt á fjölbreyttan hátt. Frostin undanfarið náðist að nýta til svellgerðar og var svellið tilbúið um síðustu helgi. Yngsta stigið sem er að vinna með ummál og flatarmál dreif sig út og mældi stærð svellsins sem reyndist vera 238 m2. Íþróttatímar vikunnar hafa verið á svellinu og má sjá miklar framfarir hjá nemendum, það er skransað, rennt á öðrum fæti, rennt afturábak og sýndar listir með treflum svo eitthvað sé nefnt. Vonandi fáum við nokkra frostdaga eftir væntanlega rigningu svo við njótum svellsins aðeins lengur.

Yngsta stig og miðstig eru að vinna með mannslíkamann og samþættast þar ýmsar námsgreinar. Sumt vinna þau í sameiningu og annað í sitthvoru lagi. Saman eru þau að vinna að því að búa til ,,Operations" spil og læra þau þá samhliða ýmislegt um líffærin og raflagnir. 

Miðstig og unglingastig eru að vinna með Grunnþarfirnar fimm samkvæmt Uppbyggingarstefnunni, Uppledi til ábyrgðar- uppbygging sjálfsaga. Þessar þarfir eru öryggi, gleði, frelsi, áhrif og að tilheyra. Allir hafa sterka þörf fyrir öryggi en hinar fjórar eru þau búin að greina og finna hvar þeirra þarfir eru sterkastar. Núna eru þau að flokka hugtök tengd þörfunum í jákvæð og neikvæð til að átta sig á að stundum getum við farið út í það að uppfylla þarfirnar okkar á neikvæðan hátt.

Við fengum í hendurnar nýjar tölvur nú eftir áramótin og varð fyrir valinu að fá chromebook fartölvur fyrir nemendur. Ástæða þess vals okkar er að við teljum fartölvur nýtast betur til samvinnu en borðtölvur og einnig að tölvuvinna verði auðveldari valkostur þegar þú þarft ekki að setjast út við vegg við tölvu. Auðvitað á reynslan svo eftir að leiða í ljós hver verður raunin. Nemendur unglingastigs sem fengu hver sína tölvu til að vinna með eru allavega farnir að nýta þær í flest verkefni. Eitt sett verður svo á miðstiginu en yngsta stigið hefur einnig aðgang að þeim tölvum. 

Í dag fengum við að koma í heimsókn í Lýðskólann og kynnast verkefni Björns Steinars vöruhönnuðar sem er að kenna þar núna. Fyrirtækið hans heitir Plastplan og eru þar hannaðir hlutir úr plasti sem hann og meðeigandi hans endurvinna. Við fengum mjög mikinn fróðleik um plast og flokkun þess og munum rifja upp og vinna verkefni tengt heimsókninni í næstu viku. Krakkarnir skoðuðu hluti sem Lýðskólanemar hafa verið að gera úr endurunnu plasti og sýndu því mikinn áhuga. Hver veit nema það fæðist viðskiptahugmynd hjá einhverjum þeirra í framhaldi af þessari heimsókn. 

Bestu óskir um góða helgi. Verið óhrædd við að hafa samband og biðja mig eða Sigga Habb um að koma og opna skólann til að lána ykkur skauta. Síminn minn er 849 3446 og Sigga sími er 863 7662.

Kveðja, Sunna. 

Svona búum við til skautasvell

Yngri nemendur í sundkennslu

Samvinna í Fablab

Lampi tilbúinn í Fablab

Piparkökur skreyttar og spurningakeppni í gangi um leið

Rútuferð á leið til Ísafjarðar í safnahúsið

Allir hlusta af athygli á frásagnir af jólahefðum í öðrum löndum

Sýnishorn af jólakortum

Jólamáltiíðin í lok litlu jóla- jólafrí framundan

Þessi börðust móti storminum í leit að jólasveinunum sem við fundum svo

« 1 af 10 »

Nú þegar árið er senn á enda er ekki seinna vænna að segja fréttir af desember starfinu í grunnskólanum. 

Við náðum í upphafi mánaðarins að gera skautasvell á skólalóðinni og var það kærkomin viðbót við íþróttakennslu og hreyfingu og var mikið notað þá daga sem þess naut við. Sundkennsla var einnig í fullum gangi undir stjórn Lísu Sigurðardóttur. 

Ýmislegt jólastúss átti sér stað, skólinn var skreyttur, bakaðar kökur og piparkökur skreyttar. Lummur og eplaskífur voru bakaðar úti á eldi. Nemendur gerðu bækur um jól í mismunandi löndum og síðan fórum við í heimsókn í safnahúsið þar sem við fengum fróðleik um hinar ýmsu hefðir tengdar jólum í öðrum löndum. Mikið af fróðleiknum snerist um þær persónur sem líkjast Grýlu okkar og Jólasveinunum á einhvern hátt. Rútuferðin var nýtt til söngæfinga en tónleikar tónlistarskólans voru sama kvöld. Nemendur og starfsmenn skrifuðu jólakort hver til annars. Unglingarnir fóru í fab lab og var afraksturinn þar ýmist jólaskraut og lampar. 

Starfsmenn brugðu á leik og mættu í kjólum alla daga desembermánaðar og tóku sumir nemendanna einnig þátt þegar leið á mánuðinn. 

Litlu jólin voru haldin 18. desember, að einhverju leyti voru þau frábrugðin hefðum sem hafa verið en dagurinn var samt sem áður mjög notalegur. Allir nemendur grunnskólans voru saman, fengu kökur og kakó og spiluðu bingó. Dagurinn endaði svo á gómsætri jólamáltíð. Ekki var farið á leikskólann til að dansa með nemendum þar en við fréttum af jólasveinunum og fóru nokkrir nemendur og hittu þá úti í bæ þrátt fyrir að vindur blési hressilega. Þeir nemendur sem eru í dægradvöl fóru svo og voru með leikskólanemendum á jólaballinu þeirra. 

4. janúar verður starfsdagur þar sem starfsmenn koma saman og líta yfir farinn veg og gera áætlanir um stefnuna fram á við. Nemendur mæta svo til starfa þriðjudaginn 5. janúar. 

Bestu óskir um gleði og gæfuríkt komandi ár

Sunna

Jólaskraut unnið í fab lab

Verkefni miðstigsins- Drangajökull- Lagarfljótsormurinn og Dynjandi

Leikarar í Lagarfljóstorminum

Úr Lagarfljótsorminum

Húsin í vinnslu

Veitingar

Gestir njóta veitinganna utandyra

Grímuskylda enn í gangi

Gestir

Snjóskaflinn nýtist sem stúka

« 1 af 10 »

Heil og sæl

Vikan hófst með þemavinnu tengdri kaffihúsinu sem okkur tókst að halda á þriðjudaginn. Yngsta stigið skreytti glugga með húsunum sínum, líkönum af Goðahólnum og ljósmyndasýningu með eigin ljósmyndum en allt þetta tengist þemanu þeirra Flateyrin okkar. Þau voru líka með vísindaglugga. Miðstigið sýndi sjö mínútna myndband þar sem þau sögðu sögu Lagarfljóstormsins, þau sýndu einnig listaverk af Drangajökli og Dynjanda en þau hafa verið að læra um Vestfjarðakjálkann og Austurland. Þau sýndu einnig stjörnukort sem þau bjuggu til með plötu og ljósaseríu. Unglingastigið vann með ljóð og skreytti gluggana sína með ljóðum og myndum. Einng sá unglingastigði um að útbúa allar veitingar og voru þær ekki af verri endanum. 

Í svona vinnu reynir á frumkvæði, sköpun og sjálfstæð vinnubrögð og geftst því gott tækifæri til að meta námið út frá lykilhæfnimarkmiðum Aðalnámskrár. Lykilhæfni er almenn hæfni nemanda óháð námssviðum en er aldurstengd og fléttast inn í alla kennslu og námsmat. 

Allir nemendur lögðu mat á eigið nám. Yngstu nemendurnir fengu þessar þrjár spurningar: 

Hvað lærðir þú af því að vinna þetta verkefni?

Hvað var erfiðast?

Hverju ertu stoltastur af?

Þegar svör þeirra eru skoðuð kemur í ljós að oftast eru þau stoltust af því sem þeim þótti erfiðast sem sýnir þó nokkra seiglu. 

Miðstig og unglingastig mátu frumkvæði, sjálfstæði, áhrif, ábyrgð, færni sína í að gagnrýna og að taka leiðsögn og gagnrýni og hversu góður vinnufélagi þau séu. En allt eru það lykilhæfni þættir. 

Þó sýningin sjálf og hátíðin í kringum hana sé alltaf skemmtileg er það ferlið sem skiptir mestu máli og sá þroski og reynsla sem skapast á leiðinni að markmiðinu. 

Á miðvikudaginn fóru unglingarnir svo á Ísafjörð þar sem Eva kenndi þeim í Fab lab en þær hafa verið að undirbúa sig undanfarna miðvikudaga. Við stefnum á einn miðvikudag á Ísafirði í viðbót fyrir jólin. Það var ýmislegt fallegt sem kom út úr skurðarvélunum, meðal annars jólaskraut. 

Sundkennsla undir stjórn Lísu Sigurðardóttur heldur áfram í næstu viku, á þriðjudag og fimmtudag. 

Bestu kveðjur og góða helgi

Sunna

Stjörnuhiminn í mótun

Kvikmynd klippt og löguð

Miklar framkvæmdir í gangi

Unnið úti í glugga

« 1 af 4 »

Heil og sæl

Við erum ákveðin í að halda okkar striki og hafa okkar árlega kaffihúsakvöld þó það séu öðruvísi tímar og við þurfum að fara aðrar leiðir en áður. Viðburðurinn verður þriðjudaginn 24. nóvember og hefst klukkan 17:00. 

Nemendur unglingastigs selja veitingar í anddyri frá kl. 17:00- 18:00 og geta gestir notið þeirra meðan þeir skoða verk nemenda í gluggum skólabyggingarinnar.  

Verkin tengjast ýmsu því sem nemendur hafa verið að fást við að undanförnu, Flateyrin okkar, Vestfjarðkjálkinn, Austurland, stjörnuhimininn og ljóð svo eitthvað sé nefnt. 

Annars er bara allt gott að frétta af okkur, það var léttir að taka niður grímurnar á miðstiginu í vikunni og fá að fara í íþróttahúsið. 

Við fáum Lísu Sigurðardóttur til liðs við okkur í næstu viku en hún er í námi í Íþrótta- og heilsufræði MT og ætlar að kenna sund hjá okkur fram að jólafríi. Fyrstu sundtímarnir verða á fimmtudaginn. 

Í næstu viku hefst líka íþróttastarf HSV og verða tímar fyrir 1.-7. bekk strax að loknum skóladegi eða kl 13:20 á þriðjudögum og fimmtudögum. Leiðbeinandi þar verður Hrefna Ásgeirsdóttir og  til að byrja með verður Heiðar Birnir Þorleifsson með henni. 

Meðfylgjandi myndir eru af umdirbúningi fyrir sýninguna sem verður á þriðjudaginn. 

Bestu kveðjur og góða helgi

Sunna

Heil og sæl

Nú liggur endanlega fyrir hvernig verður með tilslakanir frá og með morgundeginum, 18. nóvember: 

• Börn í 5. – 7. bekk grunnskóla verða undanþegin grímuskyldu og 2 metra nálægðartakmörkunum, líkt og yngri börn í grunnskóla og leikskólabörn. Grímuskylda kennara gagnvart þessum börnum verður einnig afnumin. Grímuskylda og nálægðartakmörkun eiga því við milli starfsfólks í leik- og grunnskólum, milli starfsfólks og nemenda í 8.–10. bekk og milli nemenda í 8.–10. bekk.

• Áfram gildir sú regla að ekki mega vera fleiri en 50 nemendur í sama rými í leikskóla og í 1.-4. bekk grunnskóla og ekki fleiri en 25 nemendur í sama rými í 5.-10. bekk grunnskóla.

• Engar kröfur verða gerðar á útisvæðum leik- og grunnskóla sem hindra blöndun hópa, fjöldatakmarkanir, nálægðartakmarkanir eða grímunotkun.

• Íþrótta- og sundkennsla í grunnskólum er heimil með sömu takmörkunum og gilda fyrir annað skólastarf innanhúss að frátalinni grímuskyldu á unglingastigi.  Fjöldatakmarkanir eru þær sömu og í skólastarfinu (25/50)en ekki þarf að viðhalda sömu hópaskiptingu.

• Halda skal sömu hópaskiptingu nemenda í grunnskólastarfi, í félagsmiðstöðvum og á frístundaheimilum þannig að ekki verði blöndun milli nemendahópa.

• Skipulagt íþrótta-, æskulýðs- og tómstundastarf barna á leikskólaaldri er heimilt þó að hámarki 50 börn saman. Ekki þarf að halda sömu hópaskiptingu og er í leikskólastarfi.

• Skipulagt íþrótta-, æskulýðs- og tómstundastarf barna á grunnskólaaldri er heimilt, þ.e. að hámarki 50 börn í 1.–4. bekk og að hámarki 25 í 5.–10. bekk. Ekki þarf að halda sömu hópaskiptingu og er í grunnskólastarfi.

• Ekki er gerð nein breyting á greininni um tónlistarskólann í nýrri reglugerð. Þar gildir því áfram 10 manna hámarksfjöldi í rými, 2ja metra nálægðartakmörkun milli nemenda innbyrðis og nemenda og kennara og grímuskylda þar sem við verður komið. Viðhalda þarf sömu hópaskiptingu og í skólastarfi.