VALMYND ×

Fréttir

Skólahald í dag með eðlilegum hætti

Heil og sæl

Bæði leik og grunnskóli verða opnir í dag og ætti skólahald að geta verið með eðlilegum hætti. Flestar götur innanbæjar eru orðnar færar. 

Gleðilegt ár

Kæru nemendur og foreldrar

Bestu óskir um að árið 2020 verði ykkur gleði og gæfuríkt. Starf leikskólans er komið á fullt að loknu jólafríi en í grunnskólanum verður starfsdagur mánudaginn 6. janúar og hefst kennsla svo samkvæmt stundaskrá þriðjudaginn 7. janúar. Stundaskrá nemenda verður óbreytt frá því sem var fyrir áramótin. 

Mánaðarlegur starfsmannafundur leikskólans verður mánudaginn 13. janúar og opnar leikskólinn þá klukkan 10. Starfsdagur verður mánudaginn 27. janúar en þann dag ætla starfsmenn meðal annars að kynna sér starf á heilsuleikskóla. Á starfsdegi er leikskólinn lokaður allan daginn. 

Á leikskólanum höfum við fengið nýtt starfsfólk til liðs við okkur en Jóhanna Maggý Kristjánsdóttir sem er menntaður þroskaþjálfi hóf störf sem deildarstjóri í byrjun desember og nú í byrjun janúar hóf Hrefna Ásgeirsdottir störf í afleysingum vegna fæðingarorlofs. Báðar hafa þær meðal annars áhuga á útivist og hreyfingu og nýtast þeir kraftar vel í starfinu. 

Við förum inn í nýtt ár full af krafti og þori í leik og grunnskóla á Flateyri. 

Jólin nálgast

Nú líður að jólafríi í grunnskólanum og kemur hér smá frétt af fyrirkomulagi næstu daga í leik- og grunnskóla. 

Á morgun miðvikudag ætla nemendur grunnskólans að baka smákökur fyrir litlu jólin og jafnvel hita kakó og baka brauð úti. 

Á föstudaginn verða svo ,,litlu jólin" og hefst sá dagur með samveru leik- og grunnskólanemenda. Skólahópur mætir þá beint í leikskólann og koma svo grunnskólanemendur þangað um klukkan 9. Jólaballið verður svo haldið snemma morguns að þessu sinni og hefst kl 9:15. Það er von okkar að jólasveinarnir séu árrisulir og kíki við hjá okkur. Að loknu jólaballi halda grunnskólanemendur ásamt skólahóp í grunnskólann þar sem ,,litlu jólin" verða. Þá verða smákökurnar borðaðar og drukkið heitt súkkulaði. Nánara fyrirkomulag litlu jóla er í höndum nemenda og umsjónarkennara. Hátíðarmáltíð verður svo snædd, leikskólabörn og starfsmenn fá sinn mat á leikskólann en skólahópur, grunnskólanemendur og starfsnenn grunnskóla snæða sína máltíð í Gunnukaffi. Að máltíð lokinni eru grunnskólanemendur komnir í jólafrí. Dægradvöl er ekki opin þennan dag. Leikskólinn er opinn alla virka daga, þ.e. Þorláksmessu, föstudaginn 27. desember og mánudaginn 30. desember. Á aðfangadag og gamlársdag er leikskólinn lokaður. Foreldrar eru beðnir að skrá börn sín í leyfi á þar til gerðu blaði sem hangir í anddyri leikskólans ef fyrirséð er að þau mæti ekki í leikskóla á milli jóla og nýárs. 

 

Með ósk um gleðilega hátíð.  

Jólakortadagur -opið hús föstudaginn 13. desember

Á morgun föstudag ætlum við í grunnskólanum að búa til jólakort og skrifa í þau jólakveðjur til skólafélaganna. Við bjóðum bæjarbúum að koma við hjá okkur með sín kort eða kortaefni og eiga notalega stund við jólakveðjuskrif. Við verðum líka með eitthvað af efniviði til að vinna úr og hugmyndir. Hægt er að líta við hjá okkur milli klukkan 8:15 og 12:00.

Miðvikudagur 11. des

Miðað við veðurspá ætti veðrið að geta verið gengið niður í fyrramálið. Ég geri því ráð fyrir skólahaldi bæði í leik og grunnskóla. Ef foreldrar taka ákvörðun um að hafa börn heima vegna veðurs eða færðar minni ég á að koma skilaboðum í skólann í síma 450 8360, leikskóla  450 8260 eða netfang kristbjorgre@isafjordur.is.

Leik og grunnskóli

Við opnum báða skólana í dag en fólk er beðið að meta aðstæður.

Slæm veðurspá

Vegna slæmrar veðurspár er eftirfarandi upplýsingum komið á framfæri: 

Ísafjarðarbær hefur gefið út viðmið um hvenær loka eigi stofnunum vegna  óveðurs. Þar kemur m.a. fram að stofnunum bæjarins sé ekki lokað nema algjöra nauðsyn beri til og getur forstöðumaður lokað stofnun af einni eða fleirum af eftirtöldum ástæðum:

  • Tilmæli frá almannavörnum eða lögreglu
  • Rafmagnsleysi kemur í veg fyrir að hægt sé að halda stofnuninni opinni
  • Ófærð er svo almenn að ekki næst að kalla til lágmarksfjölda starfsmanna til að halda a.m.k. skertri þjónustu

Foreldrar eru hvattir til að fylgjast með veðurspám og fréttum af veðri.  Skóla verður ekki aflýst nema tilmæli komi frá Almannavörnum eða lögreglu. Komi ekki tilmæli frá Almannavörnum eða lögreglu verða foreldrar að meta hvort óhætt sé að börn þeirra sæki skóla. Ef foreldrar hafa börn sín heima þá skulu þeir tilkynna skólanum um það og lítur skólinn á slík tilvik sem eðlileg forföll. Hið sama gildir ef foreld­rar lenda í vandræðum á leið sinni til skóla og verða frá að hverfa.

Strætisvagnar Ísafjarðarbæjar hafa tekið í notkun talhólfsnúmer, 878-1012,  þar sem fram kemur hvort og þá hvaða ferðir falla niður. 

Foreldrar eru einnig hvattir til að fylgjast vel með  á heimasíðu almannavarna.

Samfélagsvika Lýðskóla - opið hús GÖ

Vikuna 9.-13. desember lítum við upp frá hefðbundnu starfi og tökum þátt í samfélagsviku Lýðskólans. Á mánudagsmorgun er unglingunum boðið að horfa á jólamynd með Lýðskólanemum. Á fimmtudaginn verður svo leikjadagur þar sem leik og grunnskólanemum bíðst að taka þátt. Á föstudaginn ætlum við svo að taka á  móti þeim gestum sem vilja koma til okkar í grunnskólann  og föndra jólakortin sín með okkur eða bara skrifa í þau.

Kaffihúsið

Æfing á Bróðir minn Ljónshjarta
Æfing á Bróðir minn Ljónshjarta
1 af 7

Kaffihúsið sem nú er orðinn árlegur viðburður hjá okkur í Grunnskóla Önundarfjarðar í tilefni af degi íslenskrar tungu  tókst frábærlega þetta árið. Húsið fylltist af gestum sem nutu þess að sjá nemendur og kennara sýna brot af því fjölbreytta starfi sem á sér stað í skólanum okkar. Fyrst sýndu nemendur leik og grunnskóla tónlistaratriði úr sögunnii Bróðir minn Ljónshjarta en tónlistarskólinn er með aðstöðu til að kenna nemendum í rúllandi stundaskrá innan skólatíma auk þess sem tónlist er kenn einu sinni í viku á yngsta og miðstigi. Í þessu atriði komu fram nemendur fra´fimm ára til fimmtán ára.  Síðan stigu nemndur unglingastigs á stokk, sungu einsöng, fluttu ljóð og að lokum sýndu þau stuttmyndina Bólufélagi sem þau settu saman eftir smásögu sem einn þeirra samdi. Að þessum flutningi loknum flæddi dagskráin um þar sem gestir fengu sér veitingar og færðu sig niður á neðri hæðina þar sem nemendur yngsta- og miðstigs voru  með lifandi sýningu á afrakstri vinnu með himingeyminn. Þar voru ýmsasr útgáfur af geimförum sem hreyfðust á mismunandi hátt með hjálp mótora, rafhlaðna og hreyfla. Einnig var hægt að sjá hvernig þau höfðu verið að kynnast notkun á smáforritum og gafst gestum kostur á að prófa og vakti það mikla lukku. Við eigum svo sannarlega mikinn mannauð hér í hæfileikaríkum nemendum og kennurum. Og við erum þakklát fyrir samfélagið sem stendur á bak við okkur og fylgist með því sem við erum að gera og tekur þátt í því. 

Kaffihús 14. nóvember

Nú stendur yfir undirbúningur fyrir kaffihúsakvöld sem haldið verður fimmtudaginn 14. nóvember 2019 kl 17:00-19.00. Nemdendur munu sýna ýmislegt sem þeir hafa verið að fást við undanfarið og má þar nefna tónlistaratriði, stuttmynd sem unnin er uppúr smásögu eftir einn nemendanna og hvernig hægt er að vinna með tækni í skólastarfi. Allri bæjarbúar eru hjartanlega velkomnir. Unglingarnir sjá um bakstur og selja veitingar í fjáröflunarskini vegna væntanlegs skólaferðalags. Verð fyrir fullorðinn 1500 krónur, grunnskólanemar utan GÖ 1.000 krónur og frítt fyrir þá sem ekki hafa náð grunnskólaaldri.